VOV4.Êđê - Leh 9 hruê ngă bruă mjêč, tlam mbruê 28/7, bruă kƀĭn ala gưl 15 bi ruê̆ leh klei kƀĭn tal 1. Blŭ bi ruê̆ klei bi kƀĭn, khua bruă kƀĭn ala Vương Đình Huệ mñă klă: Klei kƀĭn tal 1 bruă kƀĭn ala gưl 15 mâo lu boh phŭn yuôm bhăn. Dŭm čô bi ala dưi bi lar leh bruă klam pô hlăm klei ngă bruă, yua djŏ hruê mmông, ngă bruă hlăm mmông mdei, mâo lu klei mlih lehanăn klei kčĕ, boh ƀlŭ čiăng bruă kbĭn ala dưi ksiêm dlăng lehanăn bi mklă dưi mâo 29 hdră mtrŭn.

Hlăm anăn mâo 17 hdră mtrŭn kơ êpul êya lehanăn mnuih mă bruă, 11 hdră mtrŭn kơ hdră mkăp, 1 hdră mtrŭn kơ klei kƀĭn, dưi hmao mgaih msir dŭm boh klei ti anăp lehanăn bi mklă dŭm boh klei yuôm bhăn hlăm hdră êlan sui thŭn, đru bi mguôp dưi mjing sa klei kƀĭn mâo lu bruă ngă, dưi mâo klei yap yuôm bhăn mơ̆ng mnuih ƀuôn sang lehanăn phung mplĕ hră.

Y Ƀel pô mblang