VOV4.Êđê- Leh 4 hruê mă bruă hŏng klei mjêč, klă mngač, mâo bruă klam, tlam mbruê 8/7, klei kbĭn trông tal 3 êpul khua êmua gưl dlông gưl 13 ngă leh klei bi ruê̆ lehanăn dơi bi leh dŭm mta phŭn bi êdah leh êlâo anăn, dưi bi ruê̆ hnưm sa hruê mkă hŏng klei kčah. Khua gĭt gai Đảng Nguyễn Phú Trọng kiă kriê lehanăn blŭ bi ruê̆ klei kƀĭn anăn. Hŏng ai tiê dlăng klă kơ klei sĭt, ksiêm dlăng dŭm boh phŭn hŏng klei klă mngač, kreh knhâo.

Klei kƀĭn trông bi tŭ ư čih yap boh tŭ dưn hlăm bruă tui ngă hdră êlan mđĭ kyar bruă duh mkra - ala ƀuôn, ngăn prăk ala čar lehanăn bruă duh bi liê mâo hruê kčah 5 thŭn 2021-2025 čiăng hưn mdah hŏng bruă kƀĭn ala gưl 15 dưi ksiêm dlăng, bi mklă hlăm klei bi kƀĭn tal sa dưi mkŏ mjing ti knhal jih mlan 7 anei. Khua gĭt gai Đảng Nguyễn Phú Trọng brei thâo, hlăm klei kƀĭn trông gưl dlông tal 3, êpul khua êmua gưl dlông dưi lŏ ruah mbŏ 2 čô khua êmua hlăm êpul ksiêm dlăng gưl dlông. Mbĭt anăn, bruă gưl dlông lŏ bi mklă ngă bruă ƀuăh mkra hŏng Trần Văn Nam - khua hlăm bruă Đảng gưl dlông, khua bruă Đảng čar Bình Dương hŏng hdră brei mdei ngă bruă Đảng. Ngă klei ƀuah mkra hŏng Vũ Huy Hoàng, jing khua hlăm bruă Đảng gưl dlông êlâo dih hŏng hdră brei kƀiă đuê̆ mơ̆ng Đảng.

Pô mblang: Y-Ƀel Êban