VOV4.Êđê - Klei dôk hyưt anăp mâo klei bluh đĭ ktang klei ruă tưp covid 19 hlăm tar čar Bình Dương, kyua djŏ tuôm hŏng alŭ wăl anôk sang jưh dôk mơ̆ng mnuih ngă bruă lehanăn alŭ wăl duh mkra. Tui si Dhar bruă ala čar mdrơ̆ng hŏng klei ruă tưp covid 19 bi êdah ti anôk bi kƀĭn online hŏng phung khua kiă kriê čar Bình Dương, aguah mbrue (30/6). K’iăng khua knŭk kna Vũ Đức Đam, Khua Êpul bruă gĭr gai, kiă kriê klei bi kƀĭn. Hlăm klei hưn ti mmông dôk bi kƀĭn, čar Bình Dương mâo leh êbeh 300 čô mnuih djŏ klei ruă tưp Covid 19. Hlăm anăn ênoh F0 mâo hlăm 32 knơ̆ng bruă, hlăm alŭ wăl duh mkra mâo yap truh 39 čô F0. Mâo 3 anôk bi mtưp prŏng hlăm alŭ wăl lehanăn tưp lar leh truh kơ 10 boh ƀuôn hgŭm, mơ̆ng 3 kdriêk lehanăn ƀuôn prŏng. Ti anôk bi kƀĭn, K’iăng khua knŭk kna Vũ Đức Đam mtă, Bình Dương bi mta amâo mâo dưi dôk bi ngi lu mnuih, boh nik hŏng dŭm êpul ênưih lĕ hlăm klei bi tưp, mbha ngă dua hdră êlan mkă dlăng kman, ksiêm mkă hlăm yang ƀuôn, lehanăn hŏng êpul ênưih mâo klei ruă tưp, ngă bi pral bruă mkă dlăng kman hlăm sa hrue mlam, lehanăn gĭr ngă wăt realtime PCR ênoh mklin./.

Y Khem pô mblang