VOV4.Êđê - Hrue mbrue (3/8), knơ̆ng bruă sang čư̆ êa čar Bình Dương mâo mkra leh lehanăn ba yua sang êa drao jing jai truh êbeh 8 êbâo 300 boh jhưng đih pioh mdrao klei ruă tưp covid 19. Sa boh sang êa drao ti sang hră Gưl Prŏng Việt Đức, wăl krah Bến Cát, lehanăn sa boh sang êa drao ti sang mkra mơ̆ng knơ̆ng bruă tuh tia BW, ăt hlăm wăl krah Bến Cát. Dua boh sang êa drao jing jai anei mâo leh djăp kdrăp mă bruă pioh mdrao mnuih ruă covid 19 ti hnơ̆ng hdjul.

Lehanăn lŏ mâo 600 boh jhưng đih mprăp djăp kdrăp bi êwa osi phĭt sa anôk mâo mkŏ hŏng kdrăp phŭn anôk mkăp osi. Êlâo anăn, sang êa drao jing jai mrô 1 Bình Dương mơ̆ng knơ̆ng bruă Becamex IDC mkra ti anôk bruă rang mdah mnơ̆ng dhơ̆ng hŏng ala tač êngao ti ƀuôn prŏng mrâo Bình Dương hŏng 1 êbâo 500 boh jhưng đih mâo leh djăp ênŭm kdrăp mdrao mgŭn ênuk mrâo. Sang êa drao anei hlăk dôk tŭ jum mdrao mgŭn kơ êbeh 1.300 čô mnuih ruă Covid 19 lehanăn mâo leh 140 čô mnuih hlao lehanăn kbiă mơ̆ng sang êa drao./.

Y Khem pô mblang