VOV4.Êđê- khua knŭk kna mrâo mâo asăp trŭn mơĭt kơ dŭm phŭn, dhar bruă kơ bruă mđĭ hĭn dŭm hdră êlan mjêč hlăm bruă gang mkhư̆ klei pui ƀơ̆ng dliê. Hlăm asăp mtrŭn anăn mtă klă: Khua kiă kriê bruă sang čư̆ êa dŭm čar, ƀuôn prŏng hlăm gưl dlông srăng nao mjêč gĭt gai, tui ngă dŭm hdră êlan mjêč anei: Ngă tŭ jăk bruă ksiêm dlăng, gang mkhư̆ klei pui ƀơ̆ng dliê, dlăng anei jing bruă klam kñăm hĭn. Ksiêm dlăng êpul êya, êdeh êdâo, mnơ̆ng dhơ̆ng yua, ênoh prăk čiăng dưi ngă hdră êlan “4 sa anôk”, mbha bruă gak răng 24/24 hlăm jih yan adiê kkông, mkŏ mjing dŭm anôk găk răng, ksiêm dlăng dŭm anôk ênưih mâo klei pui ƀơ̆ng, ksiêm dlăng kjăp dŭm čô mnuih mŭt kbiă hlăm dliê. Hmao hmar ƀuh anôk dliê mâo pui ƀơ̆ng lehanăn truih mdjiê pui hŏng mnĭt mmông hmar hĭn, amâo dưi brei pui ƀơ̆ng prŏng ôh. Mâo dŭm hdră êlan hâo hưn, mđĭ klei thâo sang kơ mnuih ƀuôn sang, mâo bruă klam hlăm bruă gang mkhư̆ klei pui ƀơng hlăm dliê.

Pô mblang: Y-Ƀel Êban