VOV4.Êđê - Giêt, plei dưi pla lu hlăm pưk hma dŭm djuê ana dôk hdĭp mda ti krĭng čư̆ dliê Trường Sơn - Lăn Dap Kngư. Amâo djŏ knŏng jing mnơ̆ng ƀơ̆ng grăp hruê ôh, ƀiădah boh giêt krô lŏ dưi mkra mjing kdrăp pioh ayŭ, kdrăp yua hlăm klei hdĭp. Kyua anăn, dưi lač, boh giêt krô jing mnơ̆ng yua tŭ dưn hlăm klei hdĭp mjing knhuah dhar kreh jăk siam dŭm djuê ana ti Lăn Dap Kngư.

Hlăm dhar kreh mnơ̆ng ƀơ̆ng huă, boh plei, boh giêt, êdak pioh mkra mjing djam mtam mnơ̆ng ƀơ̆ng jăk snăk, lehanăn jăk ală dlăng mơh. Boh plei prŏng ƀoh mă hĕ jih tiê asăr hlăm lam, lehanăn jeh čĭm kan pioh tŭk. Boh plei prŏng jing mnơ̆ng ƀơ̆ng êjai lehanăn msĕ si mngan jam pioh dưm mnơ̆ng hŏng klei bi msiam jăk ală dlăng, dưm dăp jih jang mnơ̆ng ƀơ̆ng leh mkra mjing. Klei mmih, ƀăt, êa hrah kñĭ mjing leh kơ boh plei lŏ mđĭ mnâo mnañ, klei jăk mơ̆ng mnơ̆ng ƀơ̆ng djuê ana pô hlăm djăp knăm mơak.

Truh yan boh mnga mnơ̆ng pla mjing, lu gŏ sang ƀơ̆ng huă amâo mâo jih, bi mbha kơ hdơ̆ng găp. Mnuih găn hiu, ƀuh hlăm hma mâo lu plei êdak snăn akâo kơ pô hma bĕ duiñ sa dua boh. Tơdah pô hma êkŭt snăn nao pĕ yơh ƀiădah ngă klei bi knăl kñăm čiăng hưn kơ pô hma thâo, jing amâo mâo djŏ duah tlĕ ôh, hŏng hdră ênưih thâo kral jing mplĕ sa boh ktơr amâodah sa asăr trŏng tinăn... Tơdah ƀuh klei anăn pô hma thâo mtam mâo leh mnuih kral akâo pĕ, klei anăn amâo mâo djŏ jing klei tlĕ dăp ôh, snăn ăt mơak sơăi.

Ngă hma kreh bi knông roh hma mbĭt. Hma mâo knông mbĭt dua pô hma mâo klei čoh čuăn: Plei êdah mơ̆ng hlei hma drung mŭt hlăm hma pô adih, mboh mnga snăn pô hma nah dih pĕ ƀơ̆ng yơh, amâo mâo guôm lŏ duah akâo ôh. Pô hma dua nah ăt bi mbha mơh boh mnga pô mâo kơ hdơ̆ng găp ƀơ̆ng huă. Amâodah bi mlih hŏng lu hdră: Dưm hlăm bŭng ba kơ pô hma adih leh pĕ hlăm hma pô ba kơ sang, amâodah ba dưm kơ pưk ti hma pô gơ̆ êkŭt amâo mâo nao kơ hma hrue anăn.

Hlăm plei giêt, snănboh giêt mâo klei thâo yua lu mta bruă hĭn. Phung ƀuôn sang pĕ boh giêt mda ba wĭt ngă djam, bi boh giêt siam jăk ală dlăng snăn mkuôm lui khua, leh krô pĕ ba wĭt mjing mnơ̆ng yua kơ klei hdĭp aguah tlam mlam hrue. Arăng ƀoh ktuh hĕ jih asăr, lehanăn lŏ ƀhu boh giêt anăn hlăm mđiă čiăng bi krô kŏk, leh kơ anăn yuôl dlông pra pui pioh kơ anăn lui tơl jŭ uê pui sui thŭn mlan.

Boh giêt krô jin gmnơ̆ng pioh yua lu snăk hŏng dhar kreh klei hdĭp anak mnuih. Êngao kơ bruă pioh ngă giêt êa, boh giêt krô lŏ mkra lu mta mnơ̆ng msĕ si kriêt bưng, lehanăn lu mta mnơ̆ng yua mkăn đa đa. msĕ si boh giêt điêt pioh ngă mnơ̆ng hlăp kơ phung hđeh, boh giêt pioh trôk mđam bur msăm. Boh giêt prŏng pioh ngă mnơ̆ng dưm êsei nao kơ pưk kơ hma, pioh ngă abŭ dưm braih. Bi boh giêt kŏ kra hiên ti kkuê truă hĕ kông jing mnơ̆ng dưm braih pioh ngă yang kơ yang mdiê.

Bi hŏng boh giêt dlông, khăt sa kdrêč pioh ngă kbin hŭl điŏ. Boh krô, klĭt kpal, lehanăn đăp hŏng djâo êyăn pioh hŭl điŏ, mâo đa đa boh giêt pioh dưm mnơ̆ng čiăng čiêm mnŭ. Mâo boh giêt pioh ngă mnơ̆ng pioh hăt reh, hlăm boh giêt mâo ƀoh ƀăng điêt bi mâo êwa, mơ̆ng boh giêt prŏng pioh ngă pông rông čĭm, amâodah pioh ngă dŏ dưm mnơ̆ng nao wah kan. Anak Êđê khăt boh giêt, mniê êra djă boh giêt kdŏ, mjing êlan mđŭ êa mbŏ kơ čeh kpiê iêu jak tue nao mnăm.

Hŏng phung ƀuôn sang, boh giêt jing mnơ̆ng mnuă pioh yua hlăm klei hdĭp, giêt êa pioh nao gui êa, aguah ưm nao djăt êa ti pin êa, amâodah ti tlam leh wĭt mơ̆ng hma. Phung mniê nao bi djăp yơh êa mđŭ mơ̆ng knang êa ti pin đoh êđăp mbŏ ênŭm hlăm grăp boh giêt lehanăn gui ba wĭt kơ sang.

Drei dưi lač boh jing jing mnơ̆ng yuôm bhăn snăk hŏng klei hdĭp, ñu jing leh mnơ̆ng pioh yua hlăm djăp mta hŏng klei hdĭp, anăn jing dŏ yang adiê brei kơ anak mnuih hlăm čư̆ čhiăng yua. Boh giêt čăt jing mâo rup siam đĭng kdriêk jăk mâo anak mnuih lŏ bi msiam snăn jing leh dŏ yuôm bhăn jăk siam êdi. Anăn yơh jing boh giêt kŏ kra mâo truă hŏng kông, dưm hlăm bai hwiê mjing mnơ̆ng bi msiam jăk êdi.

Hlăm djăp mta ênai mơ̆ng kdrăp pĕ tông lehanăn ayŭ mơ̆ng čư̆ dliê snăn kăn dưi tlaih rei mâo boh giêt krô mjing ênai siam, anăn yơh jing mnơ̆ng anak mnuih drei mkra leh jing đĭng năm, amâodah mnơ̆ng ayŭ yuôm bhăn êdi mơ̆ng djăp djuê ana thâo mkra mjing. Mơ̆ng boh giêt anăn hŏng klei mbruă anak mnuih thâo bi kbiă ênai mñê jăk siam hlăm čư̆ dliê.

Boh giêt nao hlăm klei duê, mâo hlăm klei bhiăn, bi mjing lu kơ klei yăl dliê đưm, lehanăn hlăm klei blŭ tlao nao hriê mơ̆ng anak mnuih. Lŏ mñă hlăm klei yăl dliê đưm, boh giêt jing leh mnơ̆ng bi knăl kơ klei bi mguôp plah djăp djuê ana ayŏng adei./.