VOV4.Êđê- Brei Dak Lak mđĭ lu adŭ bi lông mkăp hlăm klei bi lông hriăm jih gưl 3 thŭn 2021, anei jing klei mtă mơ̆ng K’iăng Khua phŭn bruă sang hră - mtô bi hriăm Nguyễn Văn Phúc hlăm mmông mă bruă hŏng Anôk bruă gĭt gai klei bi lông hriăm jih gưl 3 thŭn 2021 čar Dak Lak kơ bruă mprăp kơ klei bi lông hriăm jih gưl 3 tlam 2-7. Êpul ksiêm dlăng leh krĭng wăl dlăng akŏ klei bi lông, brei puăng bi lông leh anăn kdrăp mnơ̆ng ti dŭm anôk bi lông ti čar. Hlăm anăn kƀĭn ksiêm dlăng ti dŭm anôk mâo phung bi lông êngiê. K’iăng Khua phŭn bruă sang hră - mtô bi hriăm Nguyễn Văn Phúc mtă, mbĭt hŏng bruă brei rơ̆ng kơ klei bi lông dưi mkŏ mjing jăk, djŏ klei kčah mtrŭn, čar Dak Lak brei lŏ mđing êdi kơ bruă rơ̆ng êđăp ênang gang mkhư̆ klei ruă tưp kơ knuă druh, nai mtô, phung mă bruă hlăm klei bi lông leh anăn phung nao bi lông. Klei bi lông hriăm jih gưl 3 thŭn anei, Dak Lak mâo êbeh 19.800 čô čih anăn bi lông. Čar dăp 32 anôk bi lông hŏng 840 anôk bi lông. Êbeh 2.700 čô knuă druh, nai mtô, phung mă bruă mtô bi hriăm, kahan ksiêm, aê mdrao … dưi ba nao ti dŭm anôk dlăng klei bi lông, ksiêm dlăng, rơ̆ng klei êđăp ênang.

Pô mblang: H’Zawut Ƀuôn Yă