VOV4.Êđê- Tui si hdră hlăm klei kƀĭn, hruê anei, bruă kƀĭn ala lŏ dơ̆ng klei êmuh leh anăn wĭt lač klei êmuh hŏng khua phŭn bruă hdră êlan leh anăn duh bi liê, Khua knŭk kna Phạm Minh Chính ăt srăng bi klă dŭm boh klei djŏ tuôm leh anăn wĭt lač dŭm klei êmuh mơ̆ng êpul bi ala bruă kƀĭn ala. Tlam mbruê, khua bruă kƀĭn ala ăt gĭt gai leh klei êmuh kơ êpul dŭm boh klei tal 4 hlăm bruă hdră êlan leh anăn duh bi liê. Mâo lu boh klei yuôm bhăn dưi bi êdah mơ̆ng phung bi ala hŏng khua phŭn bruă hdră êlan leh anăn duh bi liê Nguyễn Chí Dũng msĕ si: Hdră êlan kơrŭ wĭt leh anăn mđĭ kyar bruă duh mkra hlăm wưng klei aguah tlam mrâo, klei đru leh anăn ruh mgaih klei dleh dlan kơ dŭm knơ̆ng bruă čiăng dưi krŭ wĭt, mđĭ kyar bruă mkra mjing, mnia mblei, Hdră êlan bi hmar bruă brei čan duh bi liê bruă knŭk kna, boh nik jing dŭm hdră mkăp ala čar kñăm. Wĭt lač klei êmuh mơ̆ng phung bi ala, khua phŭn bruă Nguyễn Chí Dũng mñă klă, klei êmưt bruă brei čan duh bi liê bruă mbĭt kyua klei tui ngă hdră mkăp ti alŭ wăl. Bi kơ hdră êlan kơrŭ wĭt leh anăn mđĭ kyar bruă duh mkra hlăm wưng klei aguah tlam mrâo, khua phŭn bruă Nguyễn Chí Dũng lač, klei mtrŭt mđĭ bruă duh mkra hlăk thŭn 2009 dưi mâo leh boh tŭ dưn krŭ wĭt bruă duh mkra wưng êdei anăn, leh anăn ăt brei ƀuh klei hriăm čiăng mkŏ mjing klei mtrŭt mđĭ kơrŭ wĭt bruă duh mkra srăng dưi ngă jăk hĭn hlăm wưng kơ anăp.

Pô mblang: Y-Ƀel Êban