VOV4.Êđê- Hruê anei 28/7, Bruă kƀĭn ala kƀĭn bi ruê̆ klei kƀĭn tal 1 bruă kƀĭn ala gưl 15. Êlâo kơ bi ruê̆ klei kƀĭn, bruă kƀĭn ala dưi ksiêm dlăng leh dŭm hdră mtrŭn hlăm bruă čuăn ruah k’iăng khua knŭk kna, khua phŭn bruă, dŭm čô khua prŏng hlăm knŭk kna. Hdră mtrŭn bruă bi mklă k’iăng khua knŭk kna lehanăn dŭm čô khua êmua hlăm êpul hgŭm bruă lĭng kahan, bi klă hdră mtrŭn kơ bruă čuăn ruah khua phat kđi sang phat kđi gưl dlông. Bruă kƀĭn ala ăt ksiêm dlăng hdră mtrŭn kơ bruă tĭng mkă ngăn prăk ala čar leh bi liê thŭn 2019. Hdră trŭn kơ hdră êlan ngăn prăk ala čar 5 thŭn wưng thŭn 2021-2025. Hdră mtrŭn kơ bruă kñăm ala čar bi hrŏ klei ƀun ƀin wưng thŭn 2021-2025. Hdră mtrŭn kơ bruă kñăm ala čar mkŏ mkra krĭng ƀuôn sang mrâo wưng thŭn 2021-2025 leh anăn hdră trŭn kơ hdră êlan duh bi liê bruă mbĭt mâo wưng kčah wưng thŭn 2021-2025.

 Tlam mbruê, bruă kƀĭn ala mâo leh klei kƀĭn êngao mmông mă bruă, dưi ksiêm dlăng leh 3 hdră mtrŭn yuôm bhăn jing: Hdră mtrŭn kơ hdră êlan mđĭ kyar bruă duh mkra ala ƀuôn 5 thŭn wưng thŭn 2021-2025, hdră mtrŭn kơ bruă čih mkra klei bhiăn ala čar thŭn 2022, bi mlih hdră čih mkra klei bhiăn ala čar thŭn 2021. Hdră mtrŭn kơ bruă mkŏ mjing êpul ksiêm dlăng mơ̆ng bruă kƀĭn ala thŭn 2022. Năng mđing hĭn, thŭn 2022, bruă kƀĭn ala srăng ksiêm dlăng, brei boh blŭ čiăng bi mlih klei bhiăn yua lăn ala.

Pô mblang: Y-Ƀel Êban