VOV4.Êđê - Mmăt hruê 16/7, ti Anôk bruă kƀĭn ala, Dhar bruă kiă kriê bruă kƀĭn ala lehanăn Dhar bruă măt trận čar kwar gưl dlông Vỉệt Nam bi hgŭm mkŏ mjing Klei bi kƀĭn kơ hdră mă bruă mơ̆ng Dhar bruă kiă kriê bruă kƀĭn ala lehanăn Êpul khua kiă kriê Dhar bruă măt trận čar kwar gưl dlông Vỉệt Nam. Khua bruă kƀĭn ala Vương Đình Huệ lehanăn Khua Dhar bruă măt trận čar kwar gưl dlông Vỉệt Nam Đỗ Văn Chiến gĭt gai klei bi kƀĭn. Ti anôk bi kƀĭn, phung bi ala hmư̆ leh klei hưn mdah lehanăn bi trông kơ hdră bi hgŭm plah wah dua anôk bruă hlăm wưng êgao ăt msĕ mơh ba mdah dŭm mta klei čiăng mđĭ hnơ̆ng tŭ hdră mă bruă djŏ guôp hlăm wưng ti anăp. Blŭ hrăm klah čŭn, Khua bruă kƀĭn ala Vương Đình Huệ lač klă, čiăng lŏ mđĭ hdră bi hgŭm plah wah Dhar bruă kiă kriê bruă kƀĭn ala lehanăn Êpul kiă kriê Dhar bruă măt trận čar kwar gưl dlông Vỉệt Nam, klei bi kƀĭn tŭ ư brei hnưm ksiêm dlăng čiăng bi leh hdră bhiăn bruă ruah khua, rơ̆ng djŏ guôp hŏng klei mâo sĭt ară anei./.

H Nêč pô mblang