VOV4.Êđê - Tlam mbruê (16/8), ti sang bruă kƀĭn ala, khua bruă kƀĭn ala Vương Đình Huệ kiă kriê klei bi kƀĭn kơ bruă prăp êmiêt mơ̆ng Êpul phung bi ala bruă kƀĭn ala Việt Nam nao hlăm klei bi kƀĭn prŏng Êpul gơ̆ng AIPA – 42 srăng mkŏ mjing hŏng online hlăm dŭm hrue 23 – 25/8 mâo Ala Mtao Brunei, khua AIPA – 42 kiă kriê. Ti anôk bi kƀĭn, Khua bruă kƀĭn ala Vương Đình Huệ mñă lŏ dơ̆ng bi kjăp, ngă bruă tŭ dưn hlăm klei bi mguôp hŏng tač êngao mơ̆ng bruă kƀĭn ala jing sa mta phŭn mơ̆ng klei bi mlih bruă kƀĭn ala. Klei bi mguôp anei đru mđĭ k’hưm, klei jing, lehyanăn knuih k’hưm mơ̆ng lăn čar drei hŏng tar rŏng lăn. Hŏng klei anăn, Khua bruă kƀĭn ala mtă, dŭm dhar bruă djŏ tuôm, boh nik, êpul bruă hŏng tač êngao lehanăn Adŭ bruă kƀĭn ala, bi pral bruă prăp êmiêt lehanăn mâo hnơ̆ng kjăp jih jang bruă mơ̆ng êpul nao bi kƀĭn mơ̆ng bruă kƀĭn ala Việt Nam ti anôk bi kƀĭn prŏng Êpul gơ̆ng AIPA-42. Boh nik êjai klei ruă tưp Covid 19 adôk dleh dưi ksiêm dlăng, Khua bruă kƀĭn ala mñă, Bruă kƀĭn ala Việt Nam bi mâo klei hgŭm plah wah phung khua hlăm AIPA lehanăn dŭm ala čar hgŭm ASEAN hlăm bruă mdrơ̆ng hŏng klei ruă tưp Covid 19./.

Y Bel pô mblang