VOV4.Êđê - Tlam hruê 17/8, lŏ dơ̆ng klei bi kƀĭn tal 2, Dhar bruă gĭt gai bruă kƀĭn ala brei leh klei blŭ kơ klei bhiăn, hnơ̆ng čuăn lehanăn tĭng dlăng, đăo knăl bruă bi liê ngăn prăk knŭk kna thŭn 2022. Sa bruă mâo lu klei blŭ ba mdah lehanăn bi trông ti anôk bi kƀĭn jing klei bhiăn bruă ngăn prăk mdê. Knŭk kna hưn mdah, dŭm êpul êya dôk hluê ngă klei bhiăn bruă ngăn prăk, hnư hrui wĭt mdê ti dŭm anôk bruă srăng lŏ dơ̆ng hluê ngă hlăm thŭn 2022 truh kơ hbĭl mâo klei mkra mlih bruă prăk mlan hlăm hruê 1/7/2022.

Dhar bruă ngăn prăk knŭk kna akâo kơ Knŭk kna hlak mblang klă hĭn čiăng rơ̆ng klei kpă mngač lehanăn djŏ guôp hlăm bruă hluê ngă klei mkra mlih bruă prăk mlan lehanăn dŭm klei čih mkra djŏ tuôm kơ klei bhiăn, hnơ̆ng čuăn lehanăn tĭng dlăng, đăo knăl bruă bi liê ngăn prăk knŭk kna hlăm wưng thŭn 2022 - 2025. Kơ klei anei, Khua bruă kƀĭn ala Vương Đình Huệ mñă klă, hdră mtrŭn mơ̆ng gưl dlông mñă klă leh bruă mkra mlih prăk mlan brei hluê ngă hlăm hruê 1/7/2022, hluê anăn, jing jang klei bhiăn mdê hjăn brei lăm lui./.

H Nêč pô mblang