Bruă duh mkra ñu kma ktang êlam, bruă mkŏ mjing anăn knăl ktang yuôm bhăn. Mta knăm mơ̆ng bruă mkŏ mjing anăn knăl jing bi mâo gru kruăk, sa anăn jăk, sa rup phŭn leh anăn ênoh yuôm hĭn mâo phung blei ba yua dưi thâo kral leh anăn mĭn kơ mnơ̆ng dhơ̆ng amâodah bruă anăn. Kyuanăn knơ̆ng bruă dưi ba čhĭ mnơ̆ng dhơ̆ng ênoh yuôm hĭn, ba wĭt boh tŭ dưn hĭn.

Klei hriăm hlăm boh sĭt mơ̆ng lu ala čar dlông rŏng lăn brei ƀuh, čiăng mâo boh tŭ dưn hlăm bruă mtrŭt mđĭ klei ba čhĭ dŭm mta mnơ̆ng phŭn alŭ wăl ti dŭm anôk mnia mblei, čiăng bi myuôm bruă mkŏ mjing, răng mgang anăn knăl. Ti Việt Nam, khădah mâo leh hdră êlan mkŏ mjing anăn knăl kơ boh mnga bruă lŏ hma ba čhĭ. Ƀiădah boh klei ka klă nik ôh. Mnơ̆ng dhơ̆ng mâo hlăm dŭm hdră mtrŭn ka mâo klei bi mkŏ, klei gĭt gai plah wah dŭm tĭng djŏ tuôm… Kyuanăn, bruă mkŏ mjing anăn knăl boh mnga truh kơ ară anei ka dưi msĕ hŏng klei hmăng hmưi.

Msĕ hŏng braih, Việt Nam jing ala čar ba čhĭ braih lu tal 3 dlông rŏng lăn, ƀiădah braih mơ̆ng Việt Nam ba čhĭ hŏng klei mkra mjing, klŭng kô̆, amâo mâo anăn knăl, truh kơ ala tač êngao kơh dưi bi kluôm, mƀlĭt logo anăn knăl mơ̆ng phung ba čhĭ ti ala tač êngao. Kyuanăn, anăn knăl braih Việt Nam ăt klă sĭt ka mâo phung blei ba yua dŭm ala čar thâo klă. Phan Minh Thông, khua kiă kriê Êpul grŭp Phúc Sinh lač:

 “Dưi thâo kơ drei jing anôk ba čhĭ lu êdi ƀiădah amâo mâo thâo ôh jing anôk mnia mblei mâo anăn knăl. Dŭm anăn knăl hing ang dlông rŏng lăn amâo mâo ôh Việt Nam.”

Hluê si phung thơ̆ng kơ bruă duh mkra, Việt Nam ba čhĭ lu mta boh mnga kơ tar rŏng lăn, ƀiădah yuôm hĭn srăng ruah mă dŭm mta mnơ̆ng jăk, mâo klei găl bi ktưn čiăng mkŏ mjing anăn knăl. Mâo mnơ̆ng dhơ̆ng srăng mâo hnơ̆ng čuăn tŭ jăk leh anăn hdră êlan maketinh hnơ̆ng lăn čar… Sa klei năng ênguôt ară anei, khădah đa đa boh mnga hlăm lăn čar mâo hnơ̆ng tŭ jăk ƀiădah knơ̆ng bruă amâo mâo djăp ai dưi ngăn prăk čiăng mkŏ mjing krĭng pla mjing mnia mblei. Klei anei čiăng êdi klei uêñ mĭn mơ̆ng dŭm anôk bruă knŭk kna, mâo dŭm hdră êlan đru djŏ guôp, đru kơ knơ̆ng bruă ktang hĭn. Lê Thanh Hoà, K’iăng khua anôk bruă ksiêm dlăng hnơ̆ng tŭ jăk bruă mkra mjing leh anăn mđĭ kyar anôk mnia mblei, Phŭn bruă lŏ hma leh anăn mđĭ kyar krĭng ƀuôn sang brei thâo:

 “Jih jang knơ̆ng bruă Việt Nam jing knơ̆ng bruă điêt leh anăn man dưn, ăt msĕ mơh drei kƀah ngăn prăk, drei kƀah klei thâo hlăm bruă mnia mblei, boh nik jing klei mnia mblei hŏng tač êngao. Anăn jing dŭm klei kâo mĭn hlăm wưng kơ anăp drei srăng gĭr ngă jăk hĭn hlăm bruă anei. Drei mkăp brei lu mta mnơ̆ng dhơ̆ng kơ dŭm knơ̆ng bruă mkra mjing mnơ̆ng ƀơ̆ng tar rŏng lăn, ƀiădah mnơ̆ng dhơ̆ng knhal tuč amâo mâo ôh anăn knăl Made in Việt Nam. Anei jing klei luč liê mâo anôk bruă kriê dlăng knŭk kna srăng ƀuh klă, čiăng mâo hdră êlan găl guôp hĭn đru kơ dŭm knơ̆ng bruă ba mnơ̆ng thơ̆ng tŭ jăk hlăm anôk mnia mblei tar rŏng lăn hŏng anăn knăl Việt Nam.

Hluê si Trần Văn Trung – Khua kiă kriê knơ̆ng bruă duh bi liê Hải Âu Việt, bruă mkŏ mjing anăn knăm kơ boh mnga Việt Nam jing boh klei mjêč. Nao mbĭt hŏng klei anăn, knơ̆ng bruă leh anăn dhar bruă djŏ tuôm ăt čiăng uêñ mĭn kơ bruă rơ̆ng kơ anăn knăl. Klei anei srăng đru kơ knơ̆ng bruă bi hrŏ jih hnơ̆ng klei hmăi mơ̆ng bruă duah mă, yua anăn knăl soh hŏng hdră bhiăn mơ̆ng pô mkăn. Mơ̆ng anăn dưi kơ kơhưm, klei hing ang anăn knăl ti anôk mnia mblei.

 “Mơ̆ng anôk mnia mblei Dưr truh kơ Dhŭng mâo leh braih ST25 čhĭ amâo mâo djŏ ênoh mơ̆ng 150.000 prăk. Bi hŏng êlâo dih, sitôhmô Krĭng Dưr braih Hải Hậu jing hing ang êdi, djăp anôk yuôl čih čhĭ braih Hải Hậu. Diñu čhĭ ăt mâo phung blei mnơ̆ng mgưt. Tal 2 jing knơ̆ng bruă amâo mâo dlăng yuôm bruă rơ̆ng kơ anăn knăl, sĭt tam mâo klei truh pô amâo mâo klei dưi rơ̆ng kơ anăn knăl.

Phung thơ̆ng kơ bruă lač, Việt Nam čiăng êdi kơ anăn knăl mbĭt kơ boh mnga Việt Nam leh anăn dưi mkŏ mjing logo. Bi kơ dŭm knơ̆ng bruă ba čhĭ ăt bi mâo djăp ênŭm klei čuăn mơ̆ng phung blei, ngă bruă mkra mjing čiăng bi mâo djăp mnơ̆ng dhơ̆ng, hnơ̆ng tŭ jăk, ênoh čhĭ. Uêñ mĭn kơ bruă mkra mjing čiăng mkŏ mjing anăn knăl krĭng pla mjing hơĭt kjăp kơ grăp boh mnga.