Dlăng mơ̆ng dlông, 18 kdrăn dăp trim msĕ hŏng čhiên mkŭp mâo ênhă êbeh 30ha mơ̆ng čư̆ čhiăng Si Pa Phìn dưi luôm hŏng êa mtah. Grăp ală wăl dưi čuăl mkă hluê si grăp čuê čiăng pla djam, êtak êbai, boh kroh hluê hŏng yan hŏng dŭm sang ală kĭng, sang ñuăl mrâo mrang.

Vàng A Kỷ, khua dlăng bruă Đảng să Si Pa Phìn brei thâo: kluôm alŭ wăl anei êlâo dih jing lăn pla mjing dưi mbha kơ mnuih ƀuôn sang hriê dôk. Hlăm gưl hriê dôk tal êlâo ti krah thŭn 1992, mnuih ƀuôn sang lông pla kbâo, pla dliê ƀiădah amâo mâo tŭ dưn kyua kbâo amâo mâo sang măi mkra mjing, amâo mâo pô blei, pla dliê ăt dleh mơh kyua hnơ̆ng phŭn kyâo hdĭp mâo knŏng ƀiă kyua kƀah êa.

Klei hdĭp mơ̆ng mnuih djuê ana Thái ti dŭm ƀuôn dôk mrâo msĕ si: Tân Lập, Tân Hưng, Chiềng Nưa, Tân Phong… ăt kyuanăn tuôm hŏng lu klei dleh dlan êjai knŏng knang kơ ênhă điêt mdiê lŏ leh anăn mă bruă mưn kơ arăng. Klei ư̆ êpa, ƀun ƀin ngă kơ lu gŏ sang lui ƀuôn sang nao mă bruă mưn ti ƀuôn prŏng, anak điêt mơĭt kơ amĭ ama mduôn, sang pưk tơl ênguôl, ƀuôn ƀun ƀin mnuih knŏng ƀiă lŏ ƀiă hĭn êjai.

Ƀiădah ară anei, čư̆ čhiăng Si Pa Phìn mâo leh klei mlih hŏng dŭm đang pla djam mta mda hŏng grăp yan. Mnuih ƀuôn sang thâo pla djam mtam, pla ana ƀơ̆ng ƀoh hlăm sang ñuăl, sang ală kĭng. Boh kroh, djam mtam mơ̆ng Si Pa Phìn amâo djŏ knŏng ba čhĭ kơ ƀuôn prŏng Điện Biên Phủ ƀiădah lŏ mkăp brei mnơ̆ng huă ƀơ̆ng grăp hruê kơ giăm 15.000 čô hđeh sang hră ti kdriêk Nậm Pồ leh anăn sa kdrêč phung hđeh sang hră ti kdriêk Mường Chả. Vàng A Kỳ, khua dlăng bruă Đảng să Si Pa Phìn lač:

Ƀrư̆ ƀrư̆ mnuih ƀuôn sang thâo ba yua hdră mnêč mrâo mrang hlăm bruă mkra mjing, mđing truh ba jao kdrăp mrâo mrang kơ mnuih ƀuôn sang ti dŭm krĭng ênŭm klei găl kơ lăn leh anăn êa čiăng lŏ dơ̆ng pŏk mlar thiăm ênhă pla mjing. Mơ̆ng anăn đru kơ mnuih ƀuôn sang ƀrư̆ ƀrư̆ mđĭ kyar bruă duh mkra, gĭr ktưn kpưn đĭ kơ mdrŏng.

Ngô Xuân Chiến, Khua adŭ bruă sang hră mơar kdriêk Nận Pô, pô kčĕ klei mĭn đang pla djam ti čư̆ čhiăng Si Pa Phìn brei thâo: Leh bruă đảng kdriêk Nậm Pồ ba mdah hdră mtrŭn mrô 56 kơ bruă mđĭ kyar krĭng pla djam, boh kroh, êtak êbai doh wưng thŭn 2023 – 2025, klei tal êlâo dưi mĭn jing bi râo klei găl bruă lŏ hma mơ̆ng čư̆ čhiăng Si Pa Phìn leh anăn rơ̆ng bi mâo djăp mnơ̆ng ƀơ̆ng huă grăp hruê kơ phung hđeh sang hră ƀun ƀin krĭng knông lăn. Klei mĭn anei mâo mtam mnuih ƀuôn sang, phung khua gĭt gai să, khua ƀuôn ti Si Pa Phìn sa ai êdi.

Kyua mâo klei sa ai mơ̆ng mnuih ƀuôn sang, bruă đua klam mơ̆ng êpul khua gĭt gai să Si Pa Phìn, keh lăn mlir čuê hŏng ênhă 30ha ti čư̆ čhiăng anei dưi mkŏ mjing. Čiăng mâo êa krih hlăm yan mbhang, mnuih ƀuôn sang, bruă sang čư̆ êa kuai lu ênao kdơ̆ng êa, ba êa mơ̆ng čư̆ hnoh Nậm Chim wĭt bi kdơ̆ng. găn djăp klei dleh dlan, mơ̆ng mlan 1/2024, đang pla mjing mkăp brei leh djam mtam huă ƀơ̆ng grăp hruê kơ êbeh 15.000 čô hđeh sang hră mơ̆ng kdriêk leh anăn ba čhĭ kơ ƀuôn prŏng Điện Biên Phủ.

Adŭ bruă sang hră mơar ăt mâo kdriêk jao bruă klam jing anôk bruă mkŏ čiăng ktuê dlăng bruă pla mjing ăt msĕ mơh dŭm hdră êlan rơ̆ng kơ djam dưi ba hlăm sang huă jih jang dưi rơ̆ng kơ klei doh êƀăt kơ phung hđeh sang hră.

Mơ̆ng đang djam Si Pa Phìn, lu gŏ sang hluê hriăm bruă pla ana kyâo, pla djam hnơ̆ng tŭ jăk hluê si hdră doh. Yuôm hĭn jing dưi bi mlih knhuah mĭn, hdră ngă.

Amai Lò Thị Phương, ti alŭ Tân Lập brei thâo, grăp mlan amai mâo 7 êklăk prăk mlan, djăp yua aguah tlam leh anăn brei anak nao sang hră. Amâo djŏ knŏng amai Phương ƀiădah lu mnuih nao mă bruă kbưi lŏ wĭt kơ ƀuôn sang pô mđĭ kyar klei hdĭp mda ti ƀuôn sang pô. Ară anei kah knar grăp hruê mâo giăm 20 čô mă bruă jing mnuih djuê ƀiă mă bruă ti đang djam, truh kơ wưng hrui êmiêt mâo truh 50 čô mă bruă.

Kyua mâo phung knuă druh să hriê ngă đang djam, brei bruă mă hơĭt kơ mnuih ƀuôn sang ară anei hmei mâo klei hdĭp jăk hĭn, anak čô nao sang hră amâo lŏ rŭng răng kơ prăk kăk. Đang djam doh kyuanăn mă wĭt ƀơ̆ng hlăm gŏ sang.

Čư̆ čhiăng Si Pa Phìn ară anei hơô ao mrâo hŏng êa mtah hlăm 4 yan. Mơ̆ng đang djam anei, klei hmăng hmưi tlaih ƀun mơ̆ng mnuih ƀuôn sang hlăm să ăt kpưn đĭ hŏng bruă mkra wĭt lăn lŏ, lăn dliê, pŏk phai ênhă pla djam, pla hbei čiăng đru hŏng bruă sang cư̆ êa bi leh mta kñăm truh knhal jih thŭn 2024 bi hrŏ hnơ̆ng gŏ sang ƀun kluôm să adôk 32%, hrô kơ 40% msĕ hŏng hdră êlan lu thŭn êgao ti krĭng lăn dleh dlan anei.