Gŏ sang amai Lê Thị Thắm, ti ƀuôn hgŭm Chiềng Cơi, ƀuôn prŏng Sơn La ară anei dôk pla mjing giăm 2 ha djam mtam djăp mta. Tơdah êlâo adih amai Thắm kgŭ mơ̆ng ưm ba djam ba čhĭ ti sang mnia, ênoh čhĭ amâo hơĭt snăn mơ̆ng leh nao hgŭm hlăm Êpul bruă lŏ hma mtah 26-3 ti ƀuôn prŏng Sơn la, jih jang djam mtam amai pla mâo leh Êpul bruă hrui blei hŏng ênoh hơĭt. Ba yua đang war mâo lăn čăt jing ba pla djam mtam doh, grăp thŭn gŏ sang amai ăt hrui wĭt giăm 200 êklăk prăk.

Mơ̆ng leh nao hgŭm hlăm Êpul bruă snăn hnơ̆ng djam mtam pô lu mơh lehanăn mâo anôk hrui blei hơĭt, amâo ba čhĭ ti sang mnia, ênoh čhĭ mâo dua nah kuôl kă mơ̆ng tal êlâo mtam snăn pô mkăp djam, ngă djŏ si hdră bi kčah leh hŏng Êpul hgŭm bruă”.

Leh 8 thŭn ba čhĭ mnơ̆ng dhơ̆ng doh hlăm wăl anôk mnia mblei, Êpul hgŭm bruă lŏ hma mtah 26-3 jing anôk đăo knang hlăm bruă pla lehanăn hrui blei mnơ̆ng lŏ hma doh ti Sơn La. Amâo djŏ knŏng đru kơ bruă pla mjing, hrui blei mnơ̆ng lŏ hma doh kơ 12 čô lehanăn gŏ sang bi hgŭm, anei jing anôk lŏ đru mlih jao kơ hdră mnêč mrâo, đru kơ ƀĭng ngă lŏ hma bi mlih hdră mĭn, hdră ngă bruă bruă lŏ hma. Trần Mạnh Hùng, ti ƀuôn Nong Nái, să Chiềng Mung, kdriêk Mai Sơn brei thâo:

Êlâo adih pô pla mtei hnư hrui wĭt kah knar 5 êklăk prăk/mlan, ară anei pla djam giăm 2 ha kâo hrui wĭt kah knar 7 êklăk prăk/mlan. Mơ̆ng mlan 6 thŭn êlâo kâo bi hgŭm hŏng Êpul bruă ƀuh boh tŭ bru ă duh mkra đĭ hĭn. Êpul hgŭm bruă đru kơ mjeh pla, hbâo pruê lehanăn hdră mnêč dlăng kriê jăk êdi.

 Hŏng krĭng pla êbeh 13 ha, grăp mlan, êpul hgŭm mkăp kơ wăl anôk mnia mblei 30 – 40 ton djam mtam djăp mta. Čiăng hrui blei jih mnơ̆ng lŏ hma, Êpul hgŭm krơ̆ng kjăp 4 anôk rang čhĭ djam mtam mtah ti Sang mnia 7/11, sang mnia 308 lehanăn sang mnia Rặng Tếch, ƀuôn prŏng Sơn La. Krơ̆ng kjăp klei kuôl kă wưng sui hŏng dŭm anôk tŭk knă êsei djam kơ lu mnuih msĕ si sang êa drao, sang hră mbĭt anăn pŏk mlar hdră mkăp mnơ̆ng lŏ hma doh truh kơ dŭm anôk siêu thị, anôk mkăp čhĭ mnơ̆ng ti nah Dưr. Dŭm mta djam mtam, boh kroh doh mơ̆ng Êpul bruă mâo ênoh čhĭ đĭ hĭn hlăm wăl anôk mnia mblei hlăm brô 20 – 30%, mơ̆ng anăn boh tŭ yuôm bruă lŏ hma đĭ mơh. Hoàng Thị Thắm, K’iăng khua Êpul hgŭm bruă lŏ hma mtah 26-3 Sơn La brei thâo:

Hrui blei mnơ̆ng hŏng Êpul hgŭm bruă hmei mâo lu hdră mdê mdê, tal sa jing hlăm hla pŏk web yang ƀuôn msĕ si facebook, zalo lehanăn dŭm anôk mnia mblei điện tử. Hmei blei klehanăn čhĭ hluê hdră anei ba wĭt leh boh tŭ dưn klă sĭt, tuê kuôl kă blei lehanăn hmei mdiăng ba, djăp bruă dưi mkŏ mjing hŏng klei jăk găl. Hdră tal 2 jing hmei čhĭ ti dŭm anôk čhĭ mnơ̆ng čhĭ klă anăp snăn yơh.

Hŏng hdră ngă jăk, pral, bruă bi hgŭm pla mjing amâo djŏ knŏng đru kơ êpul hgŭm bruă pŏk mlar hnơ̆ng pla mjing, bi lu jơr mnơ̆ng lŏ hma, mơ̆ng mnơ̆ng lŏ hma mtah mda truh kơ dŭm mta mnơ̆ng leh mkra mjing, ƀiădah lŏ đru kơ mnuih ƀuôn sang dưi hrui blei mnơ̆ng lŏ hma hŏng ênoh hơĭt kjăp. Sa hdră duh mkra mrâo dưi mkŏ mjing, ba wĭt boh tŭ kơ jih dŭm tĭng nao hgŭm, mơ̆ng anăn đru mtrŭt mđĭ bruă duh mkra ngă lŏ hma.  Nguyễn Đình Đại, ƀuôn Thống Nhất, să Chiềng Mung, kdriêk Mai Sơn, čar Sơn La brei thâo:

Ară anei mâo boh guga, djam bei, trŏng kba dôk bi hgŭm hŏng Êpul bruă. Leh bi hgŭm dưi mâo anôk hrui blei hơĭt kjăp mnơ̆ng pô pla mjing.

  Ti dŭm krĭng ƀuôn sang mơ̆ng čar Sơn La, hdră bi hgŭm pla mjing dưi dlăng jing hdră ngă djŏ guôp, tŭ dưn hlăm hdră bi mlih bruă mkŏ dăp hdră duh mkra, mkŏ mjing hdră bi hgŭm kluôm hlăm bruă pla mjing, mđĭ hnơ̆ng tŭ jăk mnơ̆ng lŏ hma, mkăp djŏ hŏng klei čiăng mơ̆ng wăl anôk mnia mblei./.