Êpul pơ̆k mñam ƀuôn Mui 2, să Čư̆ Nĕ, kdriêk Krông Ƀŭk, čar Daklak mâo êbeh 20 êpul. Digơ̆ jing phung mâo hriăm leh ênŭm bruă pơ̆k mñam mâo êpul hgŭm bruă mniê kdriêk hgŭm hŏng anôk mjuăt bi hriăm nanao kdriêk Krông Ƀŭk mkŏ mjing mơ̆ng thŭn 2017. Leh ruĕ hriăm bruă, digơ̆ čŏng mkŏ mjing êpul bi hgŭm amai adei, mñam đêč lehanăn duah anôk čhĭ mnia mnơ̆ng pô mâo. Amai Hoàng Thị Niệm (djuê ana Tày), Jing khua êpul bruă pơ̆k mñam ƀuôn Mui 2 brei thâo, hŏng grăp mta mnơ̆ng leh mâo mñam, êpul srăng mă lehanăn jao kơ amai adei hŏng ênoh mưn jing mơ̆ng 300 – 500 êbâo prăk mơ̆ng sa mta mnơ̆ng. Bruă pơ̆k mñam knŏng mă bruă ti mmông wăn, ƀiădah mâo đru leh phung amai adei lŏ mâo prăk pioh bi liê, lehanăn dưi lŏ bi kriê pioh bruă aê aduôn pô mơh.

 "Asei mlei kâo khăp êdi hŏng bruă pơ̆k mñam hlue knhuah djuê ana Ê Đê. Ƀiădah ăt ti mmông wăn mơh mâo mñam, hlăm dŭm hrue adiê hlĭm hjan snăn dôk mñam, kñăm čiăng lŏ mâo prăk bi liê aguah tlam. Ară anei êpul mñam đêč ăt mâo mjing leh mơh bruă mă kơ phung amai adei, lehanăn digơ̆ dưi mâo prăk yua aguah tlam mơh”.

Lŏ dơ̆ng klei tŭ jing, thŭn anei, kdriêk Krông Ƀŭk lŏ pŏk adŭ mjuăt bi hriăm bruă pơ̆k mñam gưl dua. Mâo pŏk leh mơ̆ng krah mlan 3 leh êgao, mâo truh 35 čô amai adei mniê nao hriăm. Amai H’Hà Kpă, ti ƀuôn Ktơng Drun, să Čư̆ Nĕ, kdriêk Krông Ƀŭk lač:

"Phŭn tal êlâo mrâo mŭt hriăm, snăn jing dleh mơh, ƀiădah êdei kơ anăn dơ̆ng ƀrư̆ dơ̆ng mưng, ƀuh jing mâo klei khăp čiăng hriăm hĭn, grăp hrue tui nao hriăm, tơl leh jih ruĕ gưl hriăm mâo thâo mñam leh sa mta mnơ̆ng, tơdah mgi dih mâo anôk čhĭ mơh, sĭt nik klei anăn srăng đru lŏ mđĭ ênoh prăk yua kơ pô mơh”

Mbĭt hŏng bruă pơ̆k mñam, hlăm thŭn anei, kdriêk Krông Ƀŭk srăng pŏk truh 9 boh adŭ mjuăt bi hriăm bruă pral kơ êbeh 300 čô mnuih hriăm, hŏng dŭm mta bruă mâo hàn điện, mkŏ mkra êa jua, pui kmlă, tă kčoh, rông mnơ̆ng pla mmao. Aduôn Nguyễn Thị Thu Trang, K’iăng khua kiă kriê anôk mjuăt bi hriăm bruă sang hră mjuăt bi hriăm nanao kdriêk Krông Bŭk brei thâo, dŭm dhar bruă hlăm kdriêk mâo leh klei nao ksiêm, ƀuh lu mnuih mâo klei čiăng hriăm bruă, mơ̆ng anăn mâo hdră êlan mjuăt bi hriăm bruă bi djŏ guôp.

Phung hriăm jih ai tiê nao hriăm, êngao kơ klei mjuăt bi hriăm amâo mâo mă prăk ôh, snăn phung hriăm dưi lŏ mâo sa ênoh đru kơ hdră êlan mă bruă. Tal êlâo mjuăt bi hriăm kơ digơ̆thâo dŭm mta bruă djuê ana pô, anei jing bruă mơ̆ng anôk mjuăt bi hriăm nanao mtô bi hriăm, hlăm brô 3 mlan digơ̆ dưi mâo hră tŭ yap hriăm leh bruă.

 Hlăm kluôm čar Daklak, mơ̆ng thŭn 2021 truh kơ ară anei, čar mâo mjuăt bi hriăm leh bruă kơ êbeh 7.000 čô mnuih hlăm krĭng ƀuôn sang, hlăm anăn mâo êbeh 6.000 čô mnuih djuê ƀiă. Tui si knơ̆ng bruă mnuih ngă bruă, kahan êka êkeh mnuih knap mñai čar Daklak lač, leh ruĕ mjuăt bi hriăm êbeh 80% phung hriăm mâo bruă mă mrâo, amâodah lŏ mđĭ hĭn klei thâo kơ bruă, mđĭ ênoh mâo ba wĭt mơh. Nguyễn Quang Thuân, K’iăng khua knơ̆ng bruă mnuih mă bruă, phung knap mñai čar Daklak brei thâo, čiăng kơ klei mtô bi hriăm bruă mă mâo klei tŭ dưn, hdră mjuăt bi hriăm mâo mkŏ mjing tui si klei mnuih mă bruă čiăng, lehanăn djŏ hŏng klei dôk čiăng kơ mnuih ngă bruă, lehanăn kơ klei duh mkra ala ƀuôn ti alŭ wăl.

"Hmei mâo kuôl kă leh klei bi hgŭm hŏng phung duh mkra hlăm čar lehanăn êngao čar, mâo klei čiăng dôk duah mnuih ngă bruă, bi trông, mă bruă hŏng dŭm boh sang hră mtô bi hriăm bruă gưl krah, gưl mkrah dưh hlăm čar čiăng duah bi djŏ ya mta bruă mnuih mă bruă čiăng, pioh mjuăt bi hriăm. Hŏng mnuih ngă bruă êngiê hmei mă leh bruă hŏng knơ̆ng prăk đru ba bruă yang ƀuôn. Tui hlue hŏng hnơ̆ng čiăng mơ̆ng phung ngă bruă srăng brei čan, hŏng ênoh kah knar jing 50 êklăk prăk/čô mnuih”.

 Mơ̆ng klei mjuăt bi hriăm bruă knuă, mnuih ngă bruă krĭng ƀuôn sang ti Daklak mâo mprăp leh klei thâo kơ bruă, mđĭ klei thâo hĭn hlăm klei mă bruă, đru leh kơ digơ̆ mâo klei găl hĭn dua bruă bi djŏ, čiăng mâo prăk kăk hdĭp mda. Klei mjuăt bi hriăm bruă knuă dưi mkŏ mjing tui si mnuih mă bruă čiăng, djŏ hŏng klei găl ti alŭ wăl, đru leh sa kdrêč kơ klei bni mlih bruă knuă mă, mkŏ wĭt bruă duih mkra, mjing ênoh mnuih thâo kơ bruă đĭ hĭn pioh duh mkra ala ƀuôn mâo klei đĭ kyar./.