Leh sa wưng yua dŭm mta hbâo angre, êa drao răng mgang ana pla mjing kơ đang kphê, Y-Đức Êban (kreh iêo Ama Hồng) ti ƀuôn Sŭt Mgrư, să Čư̆ Suê, kdriêk Čư̆ Mgar ƀuh klă, nao mbĭt hŏng klei đĭ hriê mtah mda mơ̆ng đang kphê jing dŭm klei ruă kŏ, wir kŏ, mmăt ală mơ̆ng ñu. Kyuanăn, êjai mâo knuă druh mtrŭt mđĭ bruă lŏ hma hưn kơ klei bi hmô rông hdăm sao gang mkhư̆ mnơ̆ng ngă, ñu bi klă nao hgŭm. Leh sa thŭn hluê ngă, ñu ƀuh klă boh tŭ mơ̆ng klei bi hmô rông hdăm sao hlăm đang kphê.

 “Kâo amâo dưi ƀâo ôh mnâo êa drao hluăt, kyuadah êlâo dih kâo krih lu hĭn jing êa drao hluăt ƀơ̆ng ana leh anăn eh kan. Ƀiădah leh rông hdăm sao kâo ƀuh amâo mâo guôn krih êa drao ƀiădah adhan kphê dưi mkhư̆ hluăt ƀơ̆ng ana. Tal dua jing hbâo pruê ăt mdul ƀiă, thŭn anei kâo pruê hbâo ƀiă sơnăk.”

Bi hŏng Đặng Văn Huy ti alŭ 3, să Čư̆ Suê, kdriêk Čư̆ Mgar, pô bi mguôp, uêñ mĭn mbĭt hŏng kphê doh, bruă yua hdăm sao čiăng gang mkhư̆ klei mnơ̆ng ngă jing hdră êlan kjăp leh anăn jăk hŏng wăl hdĭp mda.

 Grăp thŭn krih êa drao răng mgang ana pla mjing hlăm brô 10 blư̆, ară anei knŏng dôk mă 2 – 3 blư̆, dưi mdul ƀiă lu ênoh prăk bi liê. Boh nik êjai krih ăt kăn guôn krih lu đei. Hnơ̆ng djŏ mta ruă knŏng dôk mă gưl 2 – 3 đuč, amâo mâo guôn srăng mgaih msir klei êa drao ngă kyua yua êgao hnơ̆ng”.

Hluê Huỳnh Văn Tấn, k’iăng khua adŭ bruă hdră mnêč – Ba jao hlăm anôk bruă răng mgang ana pla mjing krĭng kwar krah: mta phŭn yuôm hĭn mơ̆ng hdăm sao jing bruă klam mnơ̆ng hdĭp mơ̆ng ñu hlăm bruă ksiêm dlăng mnơ̆ng ngă. Boh sĭt brei ƀuh hdăm sao jing mnơ̆ng hiu duah ƀơ̆ng dŭm mta mnơ̆ng ngă, mâo wăt hluăt ƀơ̆ng ana kphê, eh kan leh anăn ksê. Êngao kơnăn, hdăm sao dưi thâo jing sa mta mnơ̆ng bi djŏ guôp pral hŏng dŭm klei mlih mơ̆ng wăl hdĭp mda. Dŭm đang kphê ti krĭng Lăn Dăp Kngư jing klei găl kơ hdăm sao đĭ lar jăk êdi. Anôk bruă răng mgang ana pla mjing krĭng kwar krah srăng lŏ dơ̆ng ksiêm duah, pŏk mlar amâo djŏ kñŏng ti ana kphê ƀiădah srăng ngă ti dŭm ana pla mjing mkăn mâo ênoh hlăm wưng kơ anăp.

“Ti krĭng Lăn Dăp Kngư, ana pla mjing yuôm êngao kơ ana kphê lŏ mâo thiăm ana durian, thŭn anei dưi ngă hlăm ana kphê ti dua čar Dak Nông leh anăn Dak Lak. Thŭn êdei, hmei srăng ngă ti ana durian. Mta kñăm jing đru kơ ƀĭng ngă lŏ hma thâo klă hĭn kơ boh tŭ mơ̆ng hdăm sao hlăm bruă gang mkhư̆ klei mnơ̆ng ngă amâo mâo djŏ knŏng ti ana kphê ƀiădah wăt kơ ana durian.”

Dưi ƀuh, rông hdăm sao hlăm đang kphê jing sa hdră êlan sinh học mâo boh tŭ dưn, luč liê ƀiă leh anăn boh nik amâo mâo bi čhŏ djan wăl hdĭp mda, djŏ guôp hŏng hdră mkra mjing bruă lŏ hma hluê êlan kjăp. Dhar bruă lŏ hma čar Dak Lak dôk mtrŭt mjhar mnuih ƀuôn sang dưn yua leh anăn pŏk mlar klei bi hmô rông hdăm sao čiăng gang mkhư̆ klei mnơ̆ng ngă kơ ana pla mjing.