Klei bi kƀĭn kñăm tĭng dlăng dŭm boh tŭ hlăm bruă ksiêm hriăm, ba yua kdrăp kreh knhâo, kdrăp mrâo hlăm bruă lŏ hma ba yua kdrăp mrâo, kdrăp sinh học mkăp kơ bruă mjut mjing mjeh mnơ̆ng rông, mjeh pla mjing, kriê pioh, mkra mjing dŭm mta ana (ana mkra êa drao, ana boh kroh, ana mkra mnơ̆ng ƀơ̆ng huă), mmao mkra êa drao lehanăn mmao ƀơ̆ng mơ̆ng dŭm čar krĭng Lăn dap kngư; Klei hriăm kơ hdră mđĭ kyar bruă lŏ hma yua kdrăp mrâo, kdrăp sinh học mơ̆ng ƀuôn prŏng Hồ Chí Minh.

Pluh pă klei kčĕ mơ̆ng phung thơ̆ng kơ bruă, phung kriê dlăng mbĭt hŏng lu klei blŭ ti anôk bi kƀĭn brei ƀuh, lăn dap kngư mâo ênhă prŏng tal 3 mơ̆ng kluôm ala lehanăn mâo klei găl mđĭ kyar bruă lŏ hma. Klă klơ̆ng, hŏng klei găl mơ̆ng yan adiê, dŭm čar Lăn dap kngư mđĭ kyar pral dŭm mta djam, mnga, boh kroh, ana sui thŭn, ana dliê kmrơ̆ng lehanăn ana mkra êa drao mâo hnơ̆ng tŭ jăk. Mơ̆ng anăn, mđĭ boh tŭ yuôm bruă duh mkra ti ênhă lăn lehanăn pŏk mlar hdră blei mnia mnơ̆ng hlăm ala čar lehanăn ba čhĭ kơ ala tač êngao msĕ si kphê, tiêu, čêñ hruê̆, kñŭl, makka, ksu. Khă snăn, boh tŭ yuôm bruă ba čhĭ, blei mnơ̆ng lŏ hma ti Lăn dap kngư dôk ƀiă, ka năng hŏng klei găl mâo.

Nguyễn Hữu Tháp, K’iăng khua Anôk bruă sang čư̆ êa čar Kon Tum lač, bruă bi hgŭm hŏng ƀuôn prŏng Hồ Chí Minh hlăm bruă ksiêm hriăm kreh knhâo, mđĭ kyar kdrăp mrâo, mtrŭt mđĭ hdră bi hgŭm srăng pŏk klei čang hmăng mrâo, đru mjing hdră bi hgŭm bruă lŏ hma năng hŏng klei găl mâo ti Lăn dap kngư.

“Ƀuôn prŏng Hồ Chí Minh jing sa anôk bruă duh mkra – yang ƀuôn phŭn lehanăn ăt jing sa anôk blei yua jăk găl. Dŭm čar Lăn dap kngư brei mâo dŭm mta mnơ̆ng mâo boh tŭ yuôm. Drei mjinh hdră bi hgŭm mđĭ kyar.

Kơ hdră bi hgŭm mđĭ kyar bruă lŏ hma ba yua kdrăp mrâo mơ̆ng dŭm čar krĭng Lăn dap kngư lehanăn ƀuôn prŏng Hồ Chí Minh, phung bi ala lač brei mâo hdră êlan klă klơ̆ng, djŏ guôp hŏng klei bhiăn, hdră mtrŭn čiăng jak iêu dŭm hdră duh mkra, anôk bruă kreh knhâo bi hgŭm duh bi liê, bi mlih kdrăp mrâo. Dŭm bruă dưi bi hgŭm ksiêm hriăm, bi leh hdră mjuăt bi hriăm mâo: Tui duah, kriê pioh mta gen dŭm mjeh djam, mnga, boh kroh, ana mkra mjing êa drao, mmao… mkăp kơ hdră mjut mjing mjeh. Bi hgŭm hŏng ƀuôn prŏng Hồ Chí Minh srăng đru kơ Lăn dap kngư mlih mrâo bruă pioh, mkra mjing leh hrui êmiêt, mjuăt bi hriăm hlăm bruă lŏ hma ba yua kdrăp mrâo.

Nai prĭn Hoàng Anh Tuấn, K’iăng khua Adŭ bruă Kreh knhâo – mjuăt bi hriăm, Anôk kriê dlăng Wăl anôk bruă lŏ hma yua kdrăp mrâo ƀuôn prŏng Hồ Chí Minh brei thâo, mâo lu hdră čiăng kơ êpul bi hgŭm ksiêm hriăm, ba yua kdrăp mrâo hlăm bruă lŏ hma kơ dŭm čar krĭng Lăn dap kngư.

“Jih jang mnơ̆ng Anôk kriê dlăng wăl ngă bruă lŏ hma mâo leh, dŭm boh tŭ dưi mâo tơdah djŏ guôp hŏng krĭng lăn dap kngư snăn anôk kriê dlăng mprăp đru. Dưi hluê ngă mđrăm mbĭt dŭm hdră bruă kreh knhâo ti alŭ wăl hluê si knơ̆ng prăk mơ̆ng alŭ wăl. Bi hgŭm hŏng ƀuôn prŏng Hồ Chí Minh amâo dah ƀuôn prŏng Hồ Chí Minh srăng pŏk ngă dŭm bruă djŏ guôp kñăm msir mghaih klei mâo mơ̆ng krĭng Lăn dap kngư. Đru hluê hdră mjuăt bi hriămn mđĭ klei thâo ba yua kdrăp mnơ̆ng ti adŭ bruă ksiêm hriăm, dŭm anôk bruă nah gŭ hlăm bruă ksiêm hriăm kreh knhâo.

Thŭn 2024, ƀuôn prŏng Hồ Chí Minh lehanăn dŭm čar krĭng Lăn dap kngư srăng mkŏ mjing 3 hdră bruă gưl krĭng, mâo” Knăm m’ak sâm lehanăn ana mkra mjing êa drai quốc tế hlăm mlan 5, Knăm rang mdah mjeh lehanăn mnơ̆ng lŏ hma ba yua kdrăp mrâo hlăm mlan 6 lehanăn Hruê kăm mnơ̆ng OCOP, mnơ̆ng jăk mdê bi krĭng lehanăn kdrăp mrâo hlăm bruă pla – kriê pioh – mkra mjing mnơ̆ng lŏ hma hlăm mlan 11. Mrâo êgao, ti Klei bi kƀĭn trông, tŭ ư leh mta phŭn pok\ hdră bi hgŭm hlăm bruă lŏ hma thŭn 2024 plah wah ƀuôn prŏng Hồ Chí Minh hŏng dŭm čar krĭng Lăn dap kngư, Đỗ Xuân Dũng, K’iăng khua Knơ̆ng bruă Lŏ hma mđĭ kyar krĭng ƀuôn sang čar Dak Lak čang hmăng bi hgŭm hŏng mnơ̆ng mâo hnơ̆ng tŭ jăk, ba wĭt boh tŭ kơ mnuih ƀuôn sang lehanăn anôk bruă duh mkra./.