Hruê mbruê 20/10, bruă sang čư êa čar Dak Lak mkŏ mjing klei kƀĭn trông ksiêm wĭt 5 thŭn hluê ngă hdră mtrŭn mrô 98/2018 mơ̆ng knŭk kna kơ hdră êlan mtrŭt mđĭ klei đĭ kyar êpul hgŭm bruă, mkŏ bruă mkra mjing, ba čhĭ boh mnga bruă lŏ hma ti alŭ wăl čar. Hluê si klei hưn hlăm klei kƀĭn trông, hluê si hdră mtrŭn 98/2018 mơ̆ng knŭk kna, čar Dak Lak dưi dưn yua mbruă, tŭ dưn hlăm boh sĭt, đru kơ lu knơ̆ng bruă, êpul hgŭm bruă leh anăn ƀĭng ngă lŏ hma mâo thiăm klei găl mđĭ kyar bruă mkra mjing, mđĭ hnư hrui wĭt.

Kluôm čar mâo hlăm brô 150 êpul hgŭm bruă lŏ hma, êbeh 270 đang war, gŏ sang rông mnơ̆ng leh anăn êbeh 15.500 gŏ sang ƀĭng ngă lŏ hma mâo klei bi mguôp mkra mjing leh anăn ba čhĭ mnơ̆ng dhơ̆ng hŏng knơ̆ng bruă. Bruă nao hgŭm hlăm klei bi hmô bi mguôp ba wĭt lu boh tŭ dưn kơ dŭm tĭng nao hgŭm. Dŭm knơ̆ng bruă, êpul hgŭm bnruă mâo anôk mkăp brei mnơ̆ng dhơ̆ng hơĭt, mâo hnơ̆ng tŭ jăk, mgaih msir anôk ba čhĭ mnơ̆ng dhơ̆ng kơ ƀĭng ngă lŏ hma leh anăn dŭm klei kuôl kă bi mguôp, mkŏ mjing bruă mă kơ mnuih ƀuôn sang. Mbĭt hŏng anăn, bruă bi mguôp dưi mkŏ mjing mnơ̆ng dhơ̆ng doh êbăt, êđăp ênang, mâo phŭn agha klă nik kơ phung blei ba yua, mkŏ mjing bruă mă kơ mnuih mă bruă. Bruă dưn yua hdră mnêč mrâo mrang hlăm bruă mkra mjing bruă lŏ hma đru bi hrŏ dŭm klei hmăi amâo mâo jăk kơ wăl hdĭp mda.