Hluê anăn, hlăm wưng tlâo mlan tal 3 leh anăn tal 4, Êpuk ksiêm dlăng mơ̆ng Knơ̆ng bruă Lŏ hma leh anăn mđĭ kyar krĭng ƀuôn sang čar Dak Lak srăng ngă klei ksiêm dlăng mjêč dŭm anôk mă bruă leh anăn ksiêm dlăng boh sĭt dŭm krĭng pla mjing, anôk đung hruh dưi brei hră tŭ yap, bi klă mrô, anôk mkra mjing, mnia mblei, anôk đŭng hruh đru kơ klei ba čhĭ durian dôk hlăm klei kriê dlăng mơ̆ng knŭk kna ti alŭ wăl čar.

Phung ksiêm dlăng jing dŭm êpul êya, grăp čô dưi tŭ yap jing pô mrô krĭng pla mjing durian. Truh kơ ară anei, Anôk bruă kiă kriê klei mŭt kbiă China brei leh 68 mrô krĭng pla mjing durian hŏng ênhă êbeh 2.500ha leh anăn mrô anôk đung hruh kơ 23 anôk ti čar Dak Lak. Hluê si Knơ̆ng bruă Lŏ hma leh anăn mđĭ kyar krĭng ƀuôn sang čar, bruă ksiêm dlăng anei srăng đru mđĭ hĭn bruă klam mơ̆ng dŭm tĭng hlăm bruă mkŏ mjing bruă pla mjing durian hŏng klei kjăp.