Leh mâo phŭn bruă lŏ hma bi trông brei hŏng klei tŭ jing, lehanăn kuôl kă hdră êlan mă bruă hŏng knơ̆ng kiă kriê klei mŭt kbiă bruă mnia mblei China, kơ klei bi mnia mblei hruh čĭm iăt Việt Nam kơ ala čar China, snăn knơ̆ng bruă hruh čĭm iăt Thành Dung, kdriêk Krông Pač, čar Dak Lak mkŏ mjing leh hdră ba čhĭ hruh čĭm iăt, lehanăn truh mlan 11/2023, anôk bruă anei mâo leh tĭn China tŭ ư. Hlăm klei ba mnơ̆ng mâo čhĭ tal êlâo truh kơ China jing 300kg hruh čĭm iăt, hŏng ênoh 12 êklai prăk.

Kluôm čar Daklak ară anei mâo êbeh 1.000 gŏ sang rông čĭm iăt, mâo jih jang truh 1.300 boh war rông čĭm iăt. Klei bi mnia mblei anei hŏng čar Daklak jing yuôm bhăn êdi, kyuadah ala čar China jing lăn čar prŏng blei lu êdi hruh čĭm iăt, klei anei đru kơ čar mâo anôk čhĭ mnia jăk, lehanăn đru kơ mnuih rông čĭm iăt hơĭt ai tiê mă bruă, lehanăn hrăm mbĭt hŏng phung duh mkra bi mnia mblei hŏng ala tač êngao./.