Dak Lak jing čar mâo ênhă pla durian prŏng hĭn hlăm lăn čar, hŏng êbeh 32.700ha. Kluôm čar mâo leh 23 anôk đung hruh leh anăn 68 mrô krĭng pla mjing hŏng ênhă êbah 2.500ha mâo China mkăp brei mrô đru kơ klei mnia mblei. Đăo knăm thŭn 2024, durian ti čar Dak Lak mâo êbeh 300.000 tôn.

Êngao kơ dŭm klei găl hlăm bruă pla mjing, durian Dak Lak ăt mâo lu klei êdu kƀah msĕ si krĭng pla mjing hliê điêt, kƀah klei mkŏ hlăm bruă pla mjing, hrui blei, mkra mjing leh anăn ba čhĭ, ka ngă djŏ hŏng dŭm klei čuăn ksiêm dlăng mnơ̆ng ngă mơ̆ng ala čar hrui blei uêñ mĭn. Čiăng bi mâo djăp klei čiăng anôk mnia mblei, phung bi ala ba mdah đa đa hdră êlan msĕ si, mđĭ hĭn klei krtiê dlăng, klei mkra mjing mơ̆ng đa đa Êpul hgŭm bruă, êpul bi mguôp, kriê dlăng mrô krĭng pla mjing, mđĭ hĭn bruă hâo hưn kñăm mđĭ klei thâo săng mnuih ƀuôn sang kơ hnơ̆ng čuăn hnơ̆ng tŭ jăk mơ̆ng phŭn.