Truh ti wưng anei, klei ruă tian kơ ŭn mâo leh hlăm 66 gŏ sang ti 17 boh să lehanăn hlăm 10 boh kdriêk wăl krah, ƀuôn prŏng hlăm čar Daklak, ngă djiê lehanăn ba bi rai leh êbeh 510 drei hŏng ênoh tĭng jih jang truh êbeh 24 tôn. Ară anei adôk 6 boh kdriêk dôk mâo klei ruă tưp ka êgao ôh 21 hrue. Bi êmô mâo klei ruă bŏk gŭ klĭt, hlăm hrue kăn, ƀuh êmô mâo klei ruă hlăm dua gŏ sang rông ti wăl krah Êa Pôč, kdriêk Čư̆ M’gar lehanăn ti să Hoà Phú, ƀuôn prŏng Buôn Ma Thuột, čar Daklak, ba bi rai tĭng jih jang truh êbeh 300kg.

Tui si ƀuh mơ̆ng akŏ thŭn truh ară anei, čar Daklak mâo leh 4 anôk êmô mâo klei ruă bŏk gŭ klĭt jing ti kdriêk Ea Súp, kdriêk Čư̆ M'gar lehanăn ƀuôn prŏng Buôn Ma Thuột, truh 9 drei êmô ruă, ba bi rai 4 drei, hŏng ênoh jih jang tĭng jing êbeh 450 kg. Thŭn anei čar bi liê giăm 29 êklai prăk pioh kơ bruă gang mkhư̆ klei ruă tưp kơ mnơ̆ng rông./.