Hlăm brô 2 mlan hŏng anei, bruă mkăp mrô knăl krĭng pla mjing boh durian hlăm čar Daklak hlăk lĕ hlăm klei dleh kpăk, hŏng giăm 40 hră mơar dôk gun kpăk. Čar mâo leh hdră êlan mghaih msir, lŏ mjing dŭm krĭng pla mjing boh durian bi djăp ênoh čuăn pioh čhĭ kơ ala tač êngao   hŏng êlan phŭn, kñăm găl djŏ ti mlan hrui bĕ boh hlăm mlan 8 anăp anei. Tui si Lê Văn Thành, Khua anôk bruă pla mjing, lehanăn răng mgang mnơ̆ng pla mjing čar Daklak, srăng mâo hlăm brô 9000 ha đang boh durian hlăm čar čhuang hlăm yan pĕ boh ti mlan 8 anăp anei. Êjai anăn, čar knŏng mrâo mkăp mă 63 mrô knăl kơ krĭng pla mjing hŏng ênhă hlăm brô 2.000ha.

Čiăng kơ bruă mkăp mrô knăl pla mjing mâo ngă hŏng klei pral, knơ̆ng bruă sang čư̆ êa čar jao leh bruă ksiêm dlăng bi mklă krĭng pla mjing kơ adŭ bruă lŏ hma dŭm kdriêk, jao kơ anôk bruă kiă kriê klei pla mjing lehanăn răng mgang mnơ̆ng pla mjing čar mkŏ mjing bruă mjuăt bi hriăm kơ phung knuă druh ngă bruă anei. Lê Văn Thành brei thâo, mbĭt hŏng boh durian, Daklak mâo hdră mkăp mrô knăl krĭng pla mjing kơ dŭm mta mnơ̆ng pla mkăn mâo klei găl hlăm klei čhĭ mnia kyuanăn bruă mjuăt bi hriăm mâo mkŏ mjing kñăm dưi mkăp mtam krĭng pla mjing djăp ênoh čuăn./.