Kdrăn lŏ djăp êa, mdiê mtah mda ti “Kdrăn lŏ 132” ti să Čư̆ Êa Lang, kdriêk Êa Kar, čar Dak Lak. Ti krah adiê mđiă hlơr, ao msah êa hŏ ƀiădah Sa Moan Krông ăt tlao mơak ti krah đang mdiê dôk mtah mda mơ̆ng gŏ sang pô. Sa Moan Krông, sang ti ƀuôn Briu, să Čư̆ Huê, kdriêk Êa Kar brei thâo, kyua kƀah lăn pla mjing, gŏ sang ñu mâo mkăp lăn ngă lŏ ti anei mơ̆ng thŭn 2016. Amâo tĭng ôh thŭn tal êlâo hnơ̆ng mâo boh mnga ƀiă kyua ka thâo kơ hdră mnêč ngă bruă, dŭm thŭn êdei kơnăn, gŏ sang ñu ngă 2 yan, mâo mdiê nanao hlăm grăp thŭn. Yan bhang thŭn anei dleh dưi ksiêm dlăng, lŏ gŏ sang ñu ti knhal tuič êlan mbông mnuôr êa, kyua anăn Sa Moan nao mơ̆ng ưm čiăng mâo êa kơ lŏ pô.

 “Ti ƀuôn Êa Đơk anei, ƀuôn Briu mâo dŭm êtuh gŏ sang mâo knŭk kna mkăp lăn lŏ, gŏ sang kâo dưi mkăp 3 sao 7 lăn lŏ. Êlan nao kơ lŏ kbưi, nao čuă dlăng nanao lŏ snăn kơh mâo êa.

Nguyễn Ngọc Hòa, Khua Anôk bruă sang čư̆ êa să Čư̆ Elang brei thâo, êngao kơ “Kdrăn lŏ 132” dưi mkŏ mkra hluê si Klei bi mklă 132/2003 mơ̆ng Khua knŭk kna, mkăp kơ mnuih ƀuôn sang djuê ƀiă kƀah lăn čiăng pla mjing. Yan Puih mnga anei, ƀĭng ngă lŏ hma hlăm să lŏ rah pla 500 ha mdiê. Mơ̆ng akŏ yan, bruă sang čư̆ êa mtrŭt leh mnuih ƀuôn sang rah pla djŏ wưng, djŏ mjeh, bi hrŏ klei rah pla ti krĭng amâo mâo êa, kyua anăn ară anei dưi bi hrŏ klei amâo djăp êa.

 “Klei adiê không kƀah êa huĭ srăng mâo. Hŏng bruă mkăp êa ti Anôk bruă knơ̆ng mbông êa, alŭ wăl pral hưn mthâo kơ mnuih ƀuôn sang, boh nik mnuih mâo lăn ngă lŏ bi hgŭm hŏng anôk bruă knơ̆ng mbông êa, ksiêm dlăng hruê mkăp êa kơ krĭng pô čiăng pral mâo hdră ba êa mŭt hlăm lŏ. Amâo lui luč liê timang lehanăn amâo dưi truh kơ đang lŏ hlăm krĭng kbưi.

Anôk bruă Knơ̆ng mbông êa Dak Lak ti Êa Kar kriê dlăng 20 hdră knơ̆ng mbông êa, mâo 18 boh ênao mgơ̆ng êa, 1 knơ̆ng kdơ̆ng êa lehanăn 1 anôk pô. Ênhă rơ̆ng mkăp djăp êa krih mơ̆ng Anôk bruă jing 3.220 ha mnơ̆ng pla djăp mta. Hlăm anăn mâo 1.800 ha ana tuh tia mkra mjing lehanăn 1.150 ha mdiê. Nguyễn Tiến Sĩ, Khua anôk bruă knơ̆ng mbông êa Dak Lak ti Êa Kar brei thâo, ară anei 14 ênao mgơ̆ng êa mâo anôk bruă kriê dlăng, hnơ̆ng êa ăt dưi rơ̆ng kjăp.

Ti knơ̆ng mbông êa Êa Rơt, jing knơ̆ng mbông êa prŏng êdi ti kdriêk Êa Kar, hŏng ênhă dưi mgơ̆ng êbeh 18 êklăk m3 êa. Êbeh 1 mlan hŏng anei, 10 čô knuă druh, mnuih mă bruă tinei bi mbha nanao pô dôk gak răng, pŏk – kđăl êa jih hruê mlam. Phạm Ngọc Linh, ksiêm dlăng bruă pŏk kđăl êa ti knơ̆ng mbông êa Êa Rơt brei thâo, hnơ̆ng êa mâo ênao êa ară anei knŏng dôk 45%. Knuă druh, mnuih mă bruă brei ksiêm dlăng nanao hnơ̆ng êa kñăm ba wĭt boh tŭ dưn lehanăn rơ̆ng klei mkiêt mkriêm.

  “Ênao êa ăt rơ̆ng kjăp hnơ̆ng êa mkăp kơ truh knhal jih yan puih mnga thŭn anei. Jih jang mơ̆ng phung khua kiă kriê truh kơ mnuih mă bruă ti anôk bruă brei bi hgŭm hŏng bruă sang čư̆ êa alŭ wăl čiăng mtô mblang kơ hdră ba yua êa hŏng klei mkiêt mkriêm”.

Dôk hlăm wưng yan bhang thu krô krĭng Lăn dap kngư, klei adiê kƀah êa dôk mâo leh ti dŭm alŭ wăl, hmăi truh kơ hnơ̆ng mâo boh mnga dŭm mta ana. Mnuih pla mdiê lŏ ti kdriêk Êa Kar, čar Dak Lak pral mâo hdră mkăp êa mđoh kơ lŏ. Yan Puih mnga ti alŭ wăl ăt dôk “dêč” kơ klei kƀah êa tŭ dưn./.