Ayŏng Lê Đình Tứ- ti alŭ 4, wăl krah Đăk Đoa, kdriêk Đăk Đoa, čar Gia Lai mrâo lông pla mjing kruê hruê̆ thŭn tal êlâo, hŏng ênoh duh bi liê giăm 100 êklăk prăk, ti đang pla mjing 300 phŭn. Ayŏng Tứ đăo knang pô pla mjing hŏng hdră hữu cơ, boh kruê̆ hruê srăng mâo hnơ̆ng tŭ jăk leh anăn ba čhĭ srăng mâo ênoh hĭn. Biădah hlăm gưl pĕ boh tal êlâo, ñu knŏng dưi čhĭ mă 4 êbâo prăk hlăm sa kg. Tơdah msĕ sơnăn, gŏ sang srăng luč hơăi mung mang. Klei hmăng hmưi “boh doh mâo ênoh” msĕ hŏng ñu tuôm mĭn dleh sơnăk jing klei sĭt:

 “Boh kruê̆ hruê̆ ksă pô čhĭ yơh. Tơdah amâo mâo čhĭ ñu luh jih kăn dưi lei. Pô ruah mă boh siam ba čhĭ ăt dleuh mơh, kyuadah boh siam knŏng ƀiă đuč. Mrâo anei arăng mtô pla boh kruê̆ doh hmư̆ ăt dleh mơh kyua srăng nao test, sa blư̆ test pô tla 3 êklăk prăk. Diñu kơ̆ng prăk pô mơ̆ng 15 – 50 kơh ba wĭt, si ngă srăng ngă, ênoh mâo 3 blư̆ mkă hŏng čhĭ sơnăn”.

Ară anei čar Gia Lai mâo krĭng pla mjing boh kruê̆ hruê̆ êbeh 5000ha ti 15 hlăm 17 kdriêk, wăl krah, ƀuôn prŏng, mbĭt hŏng 3 sang măi mkra mjing kruê̆ hruê̆ prŏng, mâo hnơ̆ng truh kơ dŭm êtuh êbâo tôn grăp thŭn. Êngao kơnăn, Gia Lai ăt mâo 20 anôk đŭng hruh leh anăn 19 krĭng pla mjing leh mâo mrô. Ƀiădah jih jang dŭm mta anăn kăn dưi gang lei klei luč ênoh mơ̆ng kruê̆ hruê̆.

        Lê Tấn Hùng- k’iăng khua adŭ bruă lŏ hma leh anăn mđĭ kyar krĭng ƀuôn sang kdriêk Đăk Đoa brei thâo: ară anei 20% hlăm ênoh 700 ha kruê̆ hruê̆ ti kdriêk, dưi bi mguôp ba čhĭ hŏng đa đa knơ̆ng bruă. Ƀiădah wăt dŭm gŏ sang ƀĭng ngă lŏ hma bi mguôp ăt kăn mâo ênoh ba čhĭ. Phŭn agha jing mmông bi klă mâo ênoh, ƀĭng ngă lŏ hma ruah hdră ba čhĭ hluê si ênoh anôk mnia mblei:

 “Ƀuăn rơ̆ng plah wah knơ̆ng bruă leh anăn gŏ sang mơ̆ng klei kuôl kă phŭn kčưm, pô ngă srăng ba čhĭ ênoh anăn. Amâodah ƀuăn srăng hrui blei hluê ênoh anôk mnia mblei, hlue si mnuih ƀuôn sang ruah ba čhĭ hŏng ênoh anôk mnia mblei. Dŭm sang măi ăt hrui blei hluê ênoh anôk mnia mblei. Anôk mnia mblei đĭ ênoh srăng đĭ, anôk mnia mblei trŭn ênoh srăng trŭn.”