Hlăm anăn, hjăn kphê mâo 490 êklăk USD, dŭm mta boh kroh mâo 120 êklăk USD. Blŭ hrăm hlăm klei bi kƀĭn ksiêm wĭt bruă mnia blei, Đoàn Ngọc Có- K’iăng Khua Knơ̆ng bruă lŏ hma leh anăn mđĭ kyar krĭng ƀuôn sang Gia Lai brei thâo, klei anei dưi mâo kyua klei bi hgŭm kjăp plah wah bruă lŏ hma leh anăn bruă mnia blei.

Ară anei kluôm čar mâo êbeh 256.000ha ana pla mjing phŭn hlue si hnơ̆ng čuăn ba čhĭ kơ ala tač êngao msĕ si GlobalGAP, Rain Forest, Oganic, 4C,… Hlăm anăn êbeh 58.000 ha dưi bi mklă phŭn agha leh anăn dŭm êtuh êbâo ha dôk hlăm dŭm hdră bi hgŭm mkra mjing, plah wah ƀĭng lŏ hma - anôk bruă duh mkra, mâo klei hgŭm mơ̆ng êbeh 200 êpul hgŭm bruă, đru ba čhĭ mnơ̆ng dhơ̆ng pral hĭn. Hlăm thŭn 2023, bruă lŏ hma leh anăn mnia blei ăt pŏk ngă lu klei bi kƀĭn mđĭ kyar dŭm bruă lŏ hma hlue si hdră kjăp,pŏk mlar anôk ba čhĭ kơ dŭm ala čar hgŭm hlăm klei kuôl kă mnia blei êngiê msĕ si: EU, Japon, Dhŭng Korea.. mđĭ ktang bruă mnia blei, duah ƀĭng hgŭm.