Hlăm wưng anei, truh ti să krĭng taih kbưi să Dă Sar, Dă Ñim, kdriêk Lạc Dương, čar Lâm Đồng srăng ƀuh klă dŭm kdrăn pla atiso mtah mda mơ̆ng mnuih ƀuôn sang djuê ƀiă. Dŭm gŏ sang tinei tlaih leh kơ ƀun mơ̆ng bruă pla ana mkra mjing êa drao. Amai Liêng Jrang K’Sáu, thôn 6, să Dă Sar, kdriêk Lạc Dương brei thâo, êlâo adih amai knŏng mưng hŏng bruă pla kphê lehanăn dŭm mta mnơ̆ng ƀiă hruê, hnư hrui wĭt amâo h’ĭt. Mâo klei đru lehanăn mđĭ ai mơ̆ng bruă sang čư̆ êa alŭ wăl, gŏ sang amai nao hgŭm hlăm Êpul pla atiso lehanăn bi mlih 3 sao lăn pla mjing lông ba pla. Mâo klei đru kluôm kơ mjeh, hbâo pruê lehanăn hdră mnêč pla mjing, leh 4 mlan mơ̆ng leh pla, amai dưi hrui wĭt 10 êklăk prăk. Amai Liêng Jrang K’Sáu brei thâo:

 “Hdră pla ba yua hbâo vi sinh, hbâo mnơ̆ng rông, amâo yua hbâo kan pruê hlăm atiso. Ana anei dưi hrui hla, mkra čiăng mnăm êa lehanăn mkra ngă êa drao kyua anăn mâo dưi yua êa drao. Anôk bruă čih klă leh snăn brei hluê ngă kjăp”.

Hlăm wưng êgao, lu mnuih ƀuôn sang djuê ƀiă ti să Dă Sar, Dă Ñim, kdriêk Lạc Dương, čar Lâm Đồng tlaih kơ ƀun mơ̆ng bruă pla atiso, bi hgŭm hŏng anôk bruă duh mkra. Mnuih ƀuôn sang hluê ngă leh hdră bi mlih ênhă lăn kphê khua thŭn, mâo mnơ̆ng ngă ba pla atiso. Leh 4 mlan, dưi hrui êmiêt hla lehanăn mâo anôk bruă nao hrui blei jih. Grăp hruê kăm, mnuih mă bruă mơ̆ng anôk bruă kreh nao truh ti kdrăn pla ksiêm dlăng, ktrâo lač kơ hdră mnêč pla mjing, dlăng kriê. Mbĭt anăn, mnuih ƀuôn sang dưi đru kơ hbâo pruê, hdră dlăng kriê lehanăn hrui êmiêt. Truh ară anei, kluôm kdriêk Lạc Dương mđĭ kyar leh 3 hdră bi hgŭm pla mjing mguôp hŏng bruă hrui blei atiso. Sử Thanh Hoài, Khua bruă Đảng kdriêk Lạc Dương brei thâo, gru hmô bi hgŭm ti alŭ wăl mđing truh kơ mnuih ƀuôn sang nao hgŭm pla mjing, bi hgŭm hŏng anôk bruă hrui blei mnơ̆ng h’ĭt kjăp:

 “Ară anei, hmei tĭng dlăng hlăm brô 1.000 m2 hlăm 1 thŭn, tĭng jih prăk bi liê ăt dôk prăk mnga mơ̆ng 25 truh kơ 30 êklăk prăk. Anei jing mnơ̆ng pla djŏ guôp hŏng lăn, yan adiê lehanăn hdră pla mjing mơ̆ng mnuih ƀuôn sang ară anei, hmei dôk bi trông čiăng lŏ mđĭ lar hĭn. Dưi lač, ngă snei srăng đru msir mghaih lu bruă kơ mnuih ƀuôn sang. Anôk bruă duh mkra kriê dlăng hdră mnêč pla mjing lehanăn hrui blei mnơ̆ng dhơ̆ng. Anei jing sa hdră mâo kdriêk Lạc Dương čiăng m’ĭt truh kñăm rơ̆ng hnơ̆ng tŭ jăk klei hdĭp mơ̆ng mnuih ƀuôn sang lehanăn mnuih blei yua.

         Mbĭt hŏng bruă ba yua hdră pla djŏ hnơ̆ng čuăn snăn bruă bi hgŭm ƀrư̆ hruê dưi pŏk mlar kñăm rơ̆ng anôk hrui blei h’ĭt kjăp kơ mnuih pla lehanăn hnơ̆ng tŭ jăk kơ dŭm anôk bruă duh mkra ăt yuôm bhăn mơh. Hoàng Sỹ Bích, Khua knơ̆ng bruă Lŏ hma lehanăn mđĭ kyar krĭng ƀuôn sang čar Lâm Đồng brei thâo, hdră msir phŭn mơ̆ng ară anei truh kơ thŭn 2030 jing mđing mguôp bruă pla mjing hŏng bruă hrui blei mnơ̆ng mơ̆ng atiso lehanăn dŭm mta ana mkra mjing êa drao mâo klei găl ti alŭ wăl. Mđing ba yua kdrăp mrâo hlăm bruă mjut mjing mjeh lehanăn hdră mnač hlăm bruă pla, dlăng kriê wiê ênăk kñăm ba wĭt boh tŭ hlăm bruă pla, mkra mjing kñăm mjing dŭm mta mnơ̆ng mâo klei bi ktưn hlăm wăl anôk mnia mblei. Mbĭt anăn, ba yua kdrăp hâo hưn ênuk mrâo hlăm hdră kriê dlăng mơ̆ng bruă pla truh kơ hrui êmiêt, ba yua dŭm mta ana mkra mjing êa drao, đru bi mklă anăn knăl, mrô krĭng pla, hrui blei ana mkra mjing êa drao, rơ̆ng kơ hnơ̆ng čuăn mơ̆ng grăp ala čar hlăm wăl anôk mnia mblei hlăm ala čar lehanăn ba čhĭ kơ ala tač êngao.

            “Êngao kơ hdră hưn mthâo anei, truh kơnăn kriê dlăng, ba yua snăn bruă kiă kriê, ksiêm dlăng hnơ̆ng tŭ jăk mnơ̆ng dhơ̆ng mâo klei mđing dlăng. Kyua anăn, hmei ăt mâo sa hdră kčah mơ̆ng anôk bruă lŏ hma lehanăn mđĭ kyar krĭng ƀuôn sang čiăng pŏk ngă kjăp bruă kiă kriê, ksiêm dlăng hnơ̆ng tŭ jăk mnơ̆ng dhơ̆ng lŏ hma hlăm hdră mkra, mđĭ kyar lehanăn răng mgang anăn knăl”.

         Boh sĭt ti lu alŭ wăl brei ƀuh, boh tŭ bruă duh mkra mơ̆ng bruă pla ana mkra mjing êa drao đĭ lu hĭn mkă hŏng dŭm mta mnơ̆ng pla mkăn. Ti lu să, ana atiso amâo djŏ knŏng jing ana msir klei ư̆ êpa, bi hrŏ klei ƀun knap ƀiădah lŏ đru kơ lu gŏ sang ti Lâm Đồng mâo hnư hrui wĭt h’ĭt kjăp, kpưn đĭ kơ mdrŏng./.