Hlăm mmông blŭ hrăm, dŭm pluh gưl klei blŭ mguôp mơ̆ng phung knuă druh, ƀĭng ngă lŏ hma mơĭt kơ khua bruă sang čư êa čar Kon Tum kñăm kơ 7 mta bruă phŭn, mâo: đru kơ klei ba čhĭ mnơ̆ng dhơ̆ng, đru klei lĭng čam, bruă lŏ hma, duh bi liê bruă mkŏ mkra, hdră đru hŏng phung knuă druh, ƀĭng ngă lŏ hma, mgaih msir klei ngă hră mơar knŭk kna leh anăn đru hdră mnêč ngă bruă, mtô kơ bruă mă.

Bi hŏng dŭm boh klei klă klơ̆ng, msĕ si, ba čhĭ boh mnga bruă lŏ hma, mnơ̆ng dhơ̆ng pơ̆k mñam, ênoh mnơ̆ng ƀơ̆ng kơ mnơ̆ng rông, hbâo pruê đĭ yuôm bi dleh kpăk bruă mkra mjing…bi ala dŭm knơ̆ng, dhar bruă djŏ tuôm mơ̆ng čar Kon Tum mâo leh klei wĭt lač klă, mbĭt anăn mtô kơ ƀĭng ngă lŏ hma dưi mă klei đru kơ hdră êlan leh anăn mjeh, ngăn prăk, hdră mnêč mtrŭt mđĭ klei đĭ kyar.

Hluê si khua bruă sang čư êa čar Kon Tum Lê Ngọc Tuấn, leh klei kƀĭn trông blŭ hrăm, čar srăng hluê ngă đa đa hdră êlan kñăm ruh mgaih klei dleh dlan, đru kơ ƀĭng ngă lŏ hma mtrŭt mđĭ bruă duh mkra bruă lŏ hma, krĭng ƀuôn sang hmar leh anăn kjăp.