Kdriêk knông lăn Ngọc Hồi, čar Kon Tum ară anei mâo 199 Anôk mđĭ mtrŭn pui kmlă 3 pha. Khădah snăn dŭm Anôk bruă pui kmlă 3 pha anei lu jing dôk hlăm dŭm êlan phŭn, êlan mlir alŭ leh anăn hlăm wăl ƀuôn sang dôk, bi ti dŭm wăl mkra mjing lŏ hma êngao kơ wăl mnuih ƀuôn sang dôk snăn ka dưi duh bi liê pui kmlă ôh.

Đinh Cao Cường, Khua dlăng bruă Đảng kdriêk Ngọc Hồi, pô bi ala Êpul gơ̆ng bruă ƀuôn sang čar Kon Tum brei thâo, ksiêm dlăng mơ̆ng anôk bruă thơ̆ng brei ƀuh, kluôm kdriêk mâo êbeh 3.000 gŏ êsei pla mjing lŏ hma hŏng ênhă êbeh 4000 ha dôk čiăng snăk ƀiădah ka mâo pui kmlă 3 pha čiăng pioh mkra mjing. Anei jing bruă mnuih ƀuôn sang leh anăn phung bi ala kơ mnuih ƀuôn sang lu blư̆ lač leh:

“Hlăm dŭm gưl bi tuôm phung bi ala kơ mnuih ƀuôn sang hŏng phung bi ala Êpul gơ̆ng čar ti kdriêk Ngọc Hồi, phung bi ala kơ mnuih ƀuôn sang lu blư̆ akâo kơ bruă pui kmlă ksiêm dlăng, ktuê dlăng rŭ mdơ̆ng êlan klei pui 3 pha čiăng mkăp pui kmlă mâo hnơ̆ng ktang kơ dŭm gŏ êsei mkra mjing lŏ hma hlăm ênhă prŏng pioh krih êa. Kâo ăt thâo klei čiăng yua pui kmlă mkra mjing ară anei ăt mjêč snăk ti dŭm alŭ wăl mkăn”.

Ară anei kluôm čar Kon Tum mâo 182 wăl mkra mjing lŏ hma êngao kơ krĭng mnuih ƀuôn sang čiăng yua oui 3 pha. Čiăng dưi rŭ mdơ̆ng êlan klei pui 3 pha kơ jih jang wăl mkra mjing lŏ hma anei, bruă pui kmlă čar Kon Tum brei mkra mlih, mjing mrâo hlăm brô 267 km êlan klei pui nah dlông, 366 km êlan klei pui nah gŭ, 219 anôk mđĭ mtrŭn pui kmlă 3 pha… hŏng ênoh bi liê mĭn tĭng êbeh 624 êklai prăk. Lê Như Nhất, Khua Knơ̆ng bruă tuh tia mnia blei čar Kon Tum brei thâo, klei čiăng kơ klei găl duh bi liê rŭ mdơ̆ng êlan klei pui 3 pha êgao kơ klei dưi mơ̆ng bruă sang čư̆ êa leh anăn bruă pui kmlă:

“Hŏng bruă bi liê êlan klei pui 3 pha pioh duh kơ bruă mkra mjing êngao wăl mnuih ƀuôn sang dôk ară anei dleh dlan snăk amâo mâo hnơ̆ng kčah ôh čiăng dưi bi liê. Kyua anăn, klei găl bi liê mơ̆ng bruă pui kmlă snăn ăt kăn dưi bi liê ti krĭng anei mơh. Dŭm wăl thơ̆ng mkra mjing snăn lu jing dôk ti êngao wăl mnuih ƀuôn sang čiăng mâo klei găl prŏng snăk bi bruă pui kmlă amâo mâo ôh klei găl. Anei jing klei gun kpăk prŏng snăk hlăm hdră pŏk ngă”.

 Čiăng ruh mgaih klei dleh dlan, msir klei kơ prăk bi liê rŭ mdơ̆ng êlan klei pui 3 pha kơ dŭm wăl mkra mjing lŏ hma êngao kơ krĭng mnuih ƀuôn sang dôk mđing pral kơ hdră kñăm bi mrâo mrang bruă tuh tia, lŏ hma, hlue si Knơ̆ng bruă tuh tia mnia blei čar Kon Tum brei hlue ngă hrăm mbĭt lu hdră msir, klă klơ̆ng msĕ si: akâo kơ Knơ̆ng bruă pui kmlă kwar Krah mđing dăp prăk bi liê, bruă pui kmlă Kon Tum đru kơ hdră mnêč kơ dŭm êpul čĭng đru mguôp prăk bi liê mkŏ êlan klei pui 3 pha kơ wăl mkra mjing; iêô mkrum klei găl mơ̆ng ala ƀuôn leh anăn gŏ êsei mkra mjing, mnia blei; bruă sang čư̆ êa dŭm gưl mâo hdră êlan đru mkăp pui kmlă 3 pha hŏng dŭm krĭng thơ̆ng pla mjing mguôp hŏng hdră mđĭ ênoh mnơ̆ng dhơ̆ng, hlăm bruă čuăl mkă brei mđing kơ bruă dăp krĭng thơ̆ng pla mjing ti dŭm krĭng găl kơ bruă mkŏ mjing êlan klei pui 3 pha./.