Mđing truh bi hdơr 94 thŭn hruê mkŏ mjing Êpul bruă phung mniê Việt Nam leh anăn hruê phung mniê Việt Nam 20/10, hruê mbruê 8/10, ti ƀuôn prŏng Kon Tum, Êpul hgŭm bruă phung mniê čar Kon Tum mkŏ mjing Hruê phung mniê čô̆ kơ bruă leh anăn ksiêm wĭt klei bi lông phung mniê čô̆ kơ bruă thŭn 2024 hŏng akŏ “phung mniê Kon Tum bi lar ngăn dŏ anôk pô dôk leh anăn mlih mtah”.

Nao hlăm klei bi lông mâo 48 klei mĭn, hlăm anăn mâo 28 klei mĭn nao hgŭm hlăm klei bi lông čô̆ kơ bruă gưl čar, 20 klei mĭn bi lông čô̆ kơ bruă gưl dlông. Hŏng dŭm hdră mkra mjing dŭm mta boh kroh, djam mtam leh anăn êa drao doh ti Kon Tum, hdră bi lông mơ̆ng amai Nguyễn Thị Minh Ngọc, Êpul hgŭm bruă phung mniê să Đăk Hring, kdriêk Đăk Hà mâo mă klei pah mni mrô 1. Êpul mkŏ mjing klei bi lông ăt mđup brei 1 klei pah mni mrô 2, 2 klei pah mni mrô 3 leh anăn 6 klei pah mni mđĭ ai kơ dŭm hdră čô̆ kơ bruă mâo lu klei găl. Čiăng bi sĭt dŭm klei mĭn, hdră čô̆ kơ bruă mơ̆ng phung hgŭm, Êpul bruă phung mniê čar Kon Tum đru kčĕ leh hŏng Knơ̆ng prăk đru ba ala ƀuôn đru kơ 28 klei mĭn čô̆ kơ bruă dưi lĭng čan prăk mnga hdjul hŏng ênoh 7 êklai prăk.