Êngao 3 drei êmô djiê, 29 drei êmô mă êa ksâo adôk mơ̆ng gŏ sang Nguyễn Thanh Phong, alŭ Duh mkra mrâo, să Tu Tra, kdriêk Đơn Dương, čar Lâm Đồng ruă tian eh m’êa, awăt, amâo čiăng ƀơ̆ng mnơ̆ng, hlăm anăn mâo dŭm drei srăng djiê hbĭl amâo thâo êlâo. Êbeh 10 hruê êgao, gŏ sang ñu luič liê lu prăk kăk blei êa drao gŭn ƀiădah amâo ba wĭt boh tŭ ôh. Phong brei thâo, gŏ sang ñu mkiêt mkriêm prăk kăk lu thŭn lehanăn lŏ čan thiăm 3 êklai prăk ti knơ̆ng prăk čiăng duh rông êpul êmô anei. Thŭn anei, êbeh mkrah wah djiê kyua tlŏ vaccine, amâo lŏ mâo mă êa ksâo, bruă duh mkra luič liê lu.

“Êpul êmô 32 drei ƀiădah djiê 3 drei ba dơr leh, 3 drei dôk ruă awăt mơh. Êmô ară anei lŏ ruă, amâo čiăng ƀơ̆ng mnơ̆ng, ruă tian 5 – 6 drei mơh. Kâo ênguôt, prăk kăn lŏ mâo, čan knơ̆ng prăk mbĭt hŏng prăk mkuôm ƀiă ba duh kơ êmô jih. Ară anei lĕ hlăm klei snei amâo lŏ thâo mgi adih si srăng jing. Čang hmăng bruă knŭk kna ksiêm dlăng mâo hdră đru kơ mnuih ƀuôn sang.

Msĕ snăn, Huỳnh Thị Kim Phượng, ti alŭ Lạc Nghiệp, să Tu Tra, kdriêk Đơn Dương ăt ênguôt hlăk ƀuh êpul êmô gŏ sang dôk đih sa anôk. Leh tlŏ vaccine gang mkhư̆ klei bŏk klĭt hruê 31/7, jih 76 drei êmô mă êa ksâo mâo klei ruă tian eh m’êa. Khădah gŏ sang blei êa drao truh 20 êklăk prăk grăp hruê ƀiădah êmô kăn suaih, 8 drei djiê leh. Phượng brei thâo, êmô ruă lehanăn djiê kyua tlŏ vaccine gang mkhư̆ klei ruă bŏk klĭt kyua anăn brei mâo klei čiu hnô kyua klei luič liê anei.

“Ka thâo ôh dŭm drei srăng lŏ djiê, kyua ară anei dŭm pluh hruê leh êmô dôk đih sa anôk snei msĕ si dôk guôn hruê djiê yơh amâo lŏ dưi mdrao ôh. Hruê hruê dôk dlăng lah êmô dôk đih sa anôk, h’ap wĭt h’ap nao amâo lŏ thâo bĭt mjing ôh. Ară anei thâo êmô ruă snei kyua vaccine ngă, bruă knŭk kna brei mâo hdră đru kơ mnuih ƀuôn sang, brei anôk bruă mkăp vaccine čiu yơh klei luič liê kơ mnuih ƀuôn sang”.

 Hluê dŭm klei bi êdah, ksiêm mkă dlăng, hlak mblang gen, Knơ̆ng bruă mdrao mgŭn, Phŭn bruă Lŏ hma – mđĭ kyar krĭng ƀuôn sang mphŭn tal êlâo bi mklă mta phŭn ngă kơ êmô ruă tian eh m’êa ti čar Lâm Đồng kyua djŏ kman Pestivirus tauri leh tlŏ vaccine NAVET-LPVAC mơ̆ng Anôk bruă Navetco. Klă klơ̆ng, boh tŭ ksiêm bi mklă ƀuh 24/24 tŏ vaccine mâo kman Pestivirus, đanei jing kman ngă klei ruă tian eh m'êa ti êmô. Mbĭt anăn, Knơ̆ng bruă mdrao mgŭn mnơ̆ng rông ăt bi mklă, amâo mâo kman ôh hlăm mnơ̆ng ƀơ̆ng lehanăn man vi sinh kơ êmô mă êa ksâo.

Ară anei, klei êmô mă êa ksâo ruă tian eh m’êa lehanăn djiê ti Lâm Đồng ăt mâo dleh dưi ksiêm dlăng, grăp hruê dôk luič liê lu kơ bruă mdrao. Khă snăn, păt čiăng jih mnuih ƀuôn sang čŏng pô tĭng dlăng jih prăk mdrao kơ êmô./.