Ti alŭ wăl čar Dak Lak mâo 51 Êpul hgŭm bruă nao hgŭm pla mjing lehanăn hrui blei mnơ̆ng hŏng dŭm anôk bruă duh mkra. Dŭm gru hmô bi hgŭm ba wĭt leh boh tŭ kơ Êpul hgŭm bruă hlăm hdră bi hrŏ ênoh bi liê, pla mjing hŏng hnơ̆ng prŏng, hnơ̆ng tŭ jăk mnơ̆ng dhơ̆ng bi knar, hdră pla mjing h’ĭt kjăp lehanăn wăl anôk hrui blei kjăp.

Hluê si Huỳnh Bài, Khua Êpul hgŭm bruă čar Dak Lak, kñăm mtrŭt mđĭ hdră bi hgŭm mơ̆ng dŭm êpul bruă lehanăn anôk bruă duh mkra, dŭm thŭn êgao, Êpul hgŭm bruă mđĭ leh hdră đru kčĕ, hlăm anăn mđing kơ bruă mjuăt bi hriăm, mtô bruă kơ phung knuă druh, mnuih hlăm Êpul hgŭm, thiăm mbŏ klei thâo hlăm bruă kriê dlăng, čih mkra hdră kčah ngă bruă, ksiêm tĭng, ksiêm dlăng… kñăm mđĭ hnơ̆ng tŭ jăk ngă bruă kơ êpul hgŭm. Mbĭt anăn, lŏ mkŏ mjing lu hdră mtrŭt mđĭ bruă mnia mblei, pŏk mlar wăl anôk blei mnia hluê hdră ba mnơ̆ng dhơ̆ng mơ̆ng êpul bruă nao hưn mthâo, rang čhĭ hlăm lehanăn êngao čar./.