Hruê mbruê (12/10), ti ƀuôn prŏng Ƀuôn Ama Thuôt, Knơ̆ng ksiêm hriăm kreh knhâo – kdrăp mrâo bruă lŏ hma dliê kmrơ̆ng Lăn dap kngư bi hgŭm hŏng Êpul ksiêm hriăm bruă lŏ hma dliê kmrơ̆ng quốc tế ti Việt Nam, Knơ̆ng bruă Lŏ hma mđĭ kyar krĭng ƀuôn sang dŭm čar Dak Lak, Dak Nông, Gia Lai mkŏ mjing klei ksiêm wĭt hdră “Mđĭ klei h’ĭt kjăp, hnơ̆ng mâo boh mnga lehanăn boh tŭ bruă duh mkra mơ̆ng hdră pla mjing lehanăn blei mnia kphê, tiu ti krĭng Lăn dap kngư” thŭn 2023 (Pia klah čŭn jing Hdră bruă V-SCOPE).

Hdră anei dưi pŏk ngă mơ̆ng mlan 2/2021 - 9/2024 ti 3 čar Gia Lai, Dak Lak, Dak Nông, mâo giăm 300 čô mă bruă pla kphê, tiu nao hgŭm. Hlăm wưng ti anăp, hdră anei srăng pŏk dŭm bruă mđing truh kơ bruă mkra mđĭ hnơ̆ng tŭ jăk lăn lehanăn ksiêm dlăng klei mnơ̆ng ngă ti dŭm anôk pla mjing, anôk mjut mjing mjeh kphê, tiu; Hdră pla mjing h’ĭt kjăp lehanăn ba wĭt boh tŭ bruă duh mkra djŏ guôp hŏng klei găl mdê bi anôk; Pŏk mlar hdră bi blŭ hrăm knŭk kna – êngao knŭk kna ti alŭ wăl kơ hdră anei./.