Anôk rŭ mkra anei duh bi liê kơ jih jang bruă nah gŭ mđĭ kyar krĭng pla mjing kphê jăk hlăm krĭng Lăn Dap Kngư, mâo bruă êlan klông krĭng ƀuôn sang mkŏ čar Gia Lai, DakLak; Mdơ̆ng 3 boh hjiê prŏng kơ 3 êpul hgŭm bruă hlăm čar Daklak, êbeh kơ 1000m2. Mdơ̆ng mrâo 2 boh hjiê mguôp hŏng anôk rang mdah kphê kơ êpul hgŭm bruă ti Gia Lai – Dak Lak hŏng ênhă 158 m2/sang. Ênoh bi liê kơ jih jang bruă anei hlăm brô 80 êklai prăk.

Mta kñăm kơ bruă anei jing mklin sa anôk ngă bruă hŏng hdră êlan mrâo mrang, ba wĭt klei tŭ dưn kjăp kơ bruă kphê, mđrĭng hŏng bruă mkŏ mkra krĭng ƀuôn sang mrâo ti dua čar Gia Lai, Dak Lak; mđĭ kyar klei bi hgŭm bruă mơ̆ng jih jang êpul bruă hgŭm, kñăm mâo ba wĭt tŭjing boh mnga mâo hlăm klei duh mkra pla mjing, wăt hlăm bruă mkra mjing lehanăn čhĭ kphê kơ ala tač êngao, mđĭ kyar klei hdĭp mda mnuih ƀuôn sang./.