Alŭ Đoàn Kết, să A Yun Hạ, kdriêk Phú Thiện hlăk jing anôk hmăi kjham hĭn mơ̆ng klei không kƀah êa. Mâo êbeh 80 ha mdiê lŏ kƀah êa anăp luič ti mang. Ti anăp klei anăn, knơ̆ng bruă sang čư̆ êa să A Yun Hạ mâo mkŏ mjing leh êpul mă bruă pral, mbĭt hŏng mnuih ƀuôn sang čŏng duah êdeh tuah lŏ nao hwai êa mơ̆ng hnoh Ia Ake lehanăn ƀuôp 21 boh kbăng êa ktir pioh krih kơ mnơ̆ng pla. Knơ̆ng bruă sang čư̆ êa kdriêk Phú Thiện ăt mâo leh mơh mơĭt kơ knơ̆ng bruă sang čư̆ êa čar Gia Lai lehanăn dŭm knơ̆ng dhar bruă djŏ tuôm pioh đru prăk kơ alŭ wăl duah êa krih mđoh kơ mnơ̆ng pla, lehanăn akâo đru kơ êdi anăp mkŏ mjing anôk kăp pom êa kơ kdrăn lŏ ti alŭ Đoàn Kết. Nguyễn Anh Tuấn, K'iăng khua knơ̆ng bruă sang čư̆ êa kdriêk Phú Thiện lač:

“Hŏng adiê không kƀah êa msĕ si ară anei, snăn kdriêk kiă kriê leh dŭm anôk bruă djŏ tuôm bi ksiêm dŭm ênha pla mjing kƀah êa, lehanăn mâo hdră êlan ktrâo atăt mnuih ƀuôn sang tui duah êa đru dŏng mnơ̆ng pla mjing. Kiă kriê dŭm alŭ wăl bi ksiêm, yap ênoh luič liê, mơ̆ng anăn čiăng mâo hdră êlan đru hŏng dŭm anôk luič liê kyua adiê không kƀah êa hŏng mnuih ƀuôn sang”.

Klei không kƀah êa anei ăt ngă leh kơ dŭm gŏ êsei mnuih ƀuôn sang hdĭp giăm knông lăn să Ia Nan, kdriêk Đức Cơ, čar Gia Lai amâo mâo êa yua hlăm klei hdĭp. Nguyễn Thanh Kiên, ti alŭ Đức Hưng, să Ia Nan, brei thâo, mnuih ƀuôn sang bi nao kbưi duah êa, blei êa mơ̆ng anôk mkăn pioh ba wĭt yua hŏng ênoh yuôm măng ai.

“Klei kơ êa yua grăp hrue hlăm gŏ sang kâo, lehanăn jih jang mnuih ƀuôn sang hlăm alŭ wăl jing lĕ hlăm klei dleh dlan, yan không kƀah êa, jing hlăm mlan amâo mâo êa yua. Nao mdiăng êa mơ̆ng kbưi čiăng mâo êa plêč braih knă êsei, thâodah rao djam, lŏ yua êa dua tlâo blư̆, hŏng êa giêt nao djăt, hlăm sa hruê liê truh mơh 3 giêt dah mkriêm”.

Ti anăp klei không kƀah êa prŏng snei, Nguyễn Chúc, K’iăng khua anôk bruă knơ̆ng mbông êa Gia Lai brei thâo hdră mơ̆ng alŭ wăl mghaih msir:

“Čiăng mâo êa kơ mnơ̆ng pla mjing, snăn mơ̆ng čar hlŏng truh kơ alŭ wăl mâo ngă leh djăp hdră, kñăm đru bi hrŏ klei luič liê mơ̆ng pla mjing, mâo bruă mbha krih êa bi kmlah, sun rơ̆k bi kpal ti phŭn mnơ̆ng pla, čiăng krơ̆ng kơ mnơ̆ng pla dưi hdĭp, dưi ba wĭt boh mnga hơĭt. Dưn yua jih hnơ̆ng klei dưi mâo êa, đru kơ mnuih ƀuôn sang mâo êa krih mđoh kơ mnơ̆ng pla mjing”.

Lưu Trung Nghĩa, Khua knơ̆ng bruă lŏ hma čar Gia Lai hưn ti anăp klei kƀah êa prŏng msĕ si ară anei, êpul êya bruă srăng mtă kơ dŭm knơ̆ng mbông êa pŏk êa đru kơ mnơ̆ng mnuih ƀuôn sang plka mjing:

“Hlăm mlan 4 anei, jing yan không kƀah êa ktang hĭn, hmei bi mguôp leh hŏng knơ̆ng bruă bi êran pui kmlă mrô 2, hlăm knơ̆ng kdơ̆ng êa ti An Khê Ka Nak pŏk êa kơ hnoh krông Pa čiăng kơ dŭm alŭ wăl dưi mâo êa pom krih kơ mnơ̆ng pla. Hmei akâo leh mơh hŏng phŭn bruă lŏ hma, knơ̆ng bruă sang čư̆ êa čar tui si klei dôk găn čiăng mâo hdră duh bi liê lŏ mkra mđĭ mnuôr mbông êa bi jăk, dưn yua êa mơ̆ng dŭm knơ̆ng êa adôk êa. Lŏ dơ̆ng ngă bruă anei, snăn jing bi mâo prăk duh bi liê čiăng kơ jih jang mnuôr mbông êa dưi mđoh êa jăk, mkriêm êa čiăng dưi mđoh êa truh kơ alŭ wăl pla mjing hlăm čar lehanăn pŏk phai anôk pla mjing"./.