Čar Dak Lak ară anei mâo hlăm brô 33.000ha durian, hlăm anăn, kdriêk Krông Pač jing krĭng mâo ênhă pla lu hĭn mơ̆ng alŭ wăl anei. Anei jing čar mâo klei đĭ kyar bruă pla mjing durian hmar hĭn hlăm lăn čar, ƀiădah bruă pla mjing durian ti čar Dak Lak ăt adôk tuôm hŏng lu klei lông dlăng, msĕ si pla hliê điêt, lu jing pla pluă hŏng kphê, hnơ̆ng mkra mjing điêt, krĭng mâo mrô knŏng ƀiă, dưn yua bruă mkra mjing mrâo mrang knŏng ƀiă, hnơ̆ng tŭ jăk ka kluôm, klei mkŏ adôk êdu kƀah, amâo mâo hrăm mbĭt…

Phung bi ala lač, čiăng ruh mgaih dŭm klei kpăk anei čiăng mâo klei nao hgŭm mơ̆ng grăp tĭng, mơ̆ng ƀĭng ngă lŏ hma, phung kreh knhâo leh anăn knơ̆ng bruă. Hluê si Nai prŏng, nai prĭn Trần Văn Hâu, hnơ̆ng tŭ jăk durian dưi dlăng jing mta yuôm bhăn hĭn, kyuanăn čiăng uêñ mĭn bi kluôm hdră pla mjing kơ grăp krĭng.

 “Drei srăng mkŏ mjing hdră pla mjing hlăm grăp anôk, mbĭt anăn jing klei găl mâo, klei thâo mơ̆ng ƀĭng ngă lŏ hma, sơnăn kơh dưi mâo boh durian jăk. Hnơ̆ng tŭ jăk durian jing yuôm bhăn. Kyuanăn, phung nao hgŭm mơ̆ng ƀĭng ngă lŏ hma truh kơ knŭk kna, knơ̆ng bruă, jih jang srăng mâo klei thâo săng, uêñ mĭn mkŏ mjing anăn knăl durian mơ̆ng alŭ wăl pô leh anăn durian mơ̆ng Việt Nam, sơnăn kơh dưi đĭ kyar kjăp”.

Hluê si pô thơ̆ng kơ bruă lŏ hma Nguyễn Thị Thành Thực, Việt Nam ka mâo ôh hdră mtrŭn klă mtô kơ bruă mkŏ mjing mrô krĭng pla mjing, klei anei dôk ngă klei dleh dlan, ngă truh klei hmăi hlăm klei bi mguôp hŏng phung ƀĭng hgŭm êjai mnia mblei.

          “Hmei hmăng hmưi leh anăn mñă kơ Phŭn bruă Lŏ hma leh anăn mđĭ kyar krĭng ƀuôn sang, dŭm knơ̆ng bruă mâo dŭm klei mtô kơ mrô krĭng pla mjing Việt Nam. Êjai drei dưi bi klă hlăm klei kreh knhâo mơ̆ng mrô krĭng pla mjing sơnăn kơh dưi hưn mdah hŏng tar rŏng lăn leh anăn mñă kơ tar rŏng lăn tŭ yap. Drei srăng ngă phŭn, amâo mâo tŭ klei kpĭ amâodah mă leh anăn mdưm leh anăn dŭm ala čar mkăn”.

Mơ̆ng boh sĭt klei pla mjing durian ti alŭ wăl, Trần Văn Thắng, pô bi ala êpul hgŭm bruă lŏ hma mtah, kdriêk Krông Pač, čar Dak Lak, hmăng hmưi knŭk kna mâo hdră êlan mđĭ kyar bruă pla mjing durian wưng sui mbĭt hŏng dŭm hdră êlan hmao ruh mgaih:

 “Klei kƀah ngăn prăk, kƀah klei thâo, mnuih mă bruă…kyuanăn yơh hmei hmăng hmưi dŭm anôk bruă djŏ tuôm dưi đru. Tơdah dưi đru ngăn prăk jing jăk êdi amâodah đru brei hdră mnêč, mtô kơ hdră ngă bruă čiăng rơ̆ng ênoh bi liê ƀiă hĭn leh anăn mđĭ hnơ̆ng tŭ jăk mnơ̆ng dhơ̆ng hlăm wưng sui kơh dưi bi djăp ênŭm klei čiăng mơ̆ng dŭm ala čar hrui blei”.

Knăm mơak durian Krông Pač, čar Dak Lak gưl tal 2 thŭn 2024 dưi tŭ jing jăk siam, mâo gru kruăk siam hlăm ai tiê mnuih ƀuôn sang leh anăn phung tuê. Knăm mơak iêo jak êbeh 350 anôk rang mdah mơ̆ng dŭm knơ̆ng bruă, êpul hgŭm bruă, anôk mkra mjing- mnia mblei durian, dŭm mta mnơ̆ng mơ̆ng duruan, mnơ̆ng dhơ̆ng OCOP leh anăn boh mnga phŭn, mnơ̆ng đru kơ bruă lŏ hma… hlăm leh anăn êngao čar, đru rang mdah, hưn mdah mnơ̆ng dhơ̆ng, dŭm mta boh kroh hnơ̆ng tŭ jăk mơ̆ng alŭ wăl.

Hlăm knăm mơak, gưl tal êlâo dŭm boh durian jăk hĭn mơ̆ng Krông Pač dưi ba bi lông blei, êpul mkŏ mjing ngă klei bi lông blei 3 boh “Hbia Durian” hŏng ênoh prăk êbeh 2 êklai 800 êklăk prăk. Jih jang ênoh prăk hlăm klei bi lông blei srăng ba yua hlăm bruă bi hơĭt klei hdĭp yang ƀuôn, mjuăt bi hriăm, đru kơ ƀĭng ngă lŏ hma pla durian kriê dlăng đang pla mjing čiăng mâo hnơ̆ng tŭ jăk, djăp ênŭm klei čuăn mnia mblei.

Knăm mơak durian Krông Pač, čar Dak Lak gưl tal 2 dưi mâo djăp dŭm hnơ̆ng čuăn. Phung tuê ala tač êngao, dŭm anôk bruă bi ala, dŭm knơ̆ng bruă hlăm leh anăn êngao lăn čar uêñ mĭn kơ durian leh anăn boh nik jing mnuih ƀuôn sang hlăm leh anăn êngao čar uêñ mĭn si srăng ngă čiăng mkŏ mjing bruă durian hŏng klei kjăp.