Ayŏng A Rất Vu, ti alŭ A Dinh, wăl krah Prao kdriêk Đông Giang pla êbeh 4ha ana mtŭk, kyua ba yua hdră mnêč mrâo hlăm bruă pla, dlăng kriê snăn đang ana mtŭk mơ̆ng ayŏng đĭ jing pral. Thŭn anei, ayŏng A Rất Vu hrui mâo giăm 100 êklăk prăk. A Rất Vu brei thâo, kyua mđĭ kyar bruă pla dliê, gŏ sang ayŏng tlaih kơ ƀun, bi hơĭt klei hdĭp. Hluê si Vu: Pla ana mtŭk ƀiă prăk duh bi liê lehanăn knŏng suaĭ hlăm wưng tal êlâo dlăng kriê. Ayŏng A Rất Vu brei thâo, ară anei gŏ sang ñu mphŭn pla ana kyâo dliê prŏng.

“Êlâo adih gŏ sang kâo knŏng ngă pưk hma knŏng djăp ƀơ̆ng, leh pla ana mtŭk klei hdĭp dưi mkra mđĭ. Leh Knŭk kna mâo hdră mtrŭn pla ana kyâo prŏng mnuih ƀuôn sang mđing hluê ngă mơh. Hmei mâo klei mĭn pla ana kyâo prŏng čiăng mđĭ kyar bruă duh mkra hơĭt kjăp hĭn. Bruă knŭk kna alŭ wăl ăt mđing đru ana mjeh anei kơ mnuih ƀuôn sang.

Msĕ hŏng ayŏng A Rất Vu, amai A Lăng Thị Trang, djuê ana Ktu ti să Ka Dăng, kdriêk Đông Giang pla êbeh 6ha ana mtŭk. Amai A Lăng Thị Trang brei thâo, kyua mđĭ lar bruă pla dliê, gŏ sang amai đĭ kyar leh. Khă snăn, čiăng ba wĭt boh tŭ sui thŭn, amai bi mlih ba pla dliê kyâo prŏng hŏng êbeh 2 ha.

 “Bi mlih ba pla ana kyâo prŏng čiăng mđĭ kyar bruă duh mkra hơĭt kjăp hĭn. Khă wưng čuăl mkă sui hĭn mkă hŏng ana mtŭk ƀiădah mâo boh tŭ dưn hĭn mkă hŏng ana mtŭk. Pla ana mtŭk hơĭt kjăp hĭn mkă hŏng pla ktơr, mdiê, tă hdră êlan čiăng pla ana kyâo dliê hŏng ênhă čuăl mkă prŏng hĭn čiăng mđĭ kyar. Klei hdĭp mơ̆ng pô ară anei đĭ kyar hĭn mkă hŏng êlâo”.

Hlăm wưng êgao, Anôk bruă sang čư̆ êa kdriêk Đông Giang, čar Quảng Nam mđing pŏk mlar ênhă dliê pla mjing, duh mđĭ hnơ̆ng tŭ jăk dliê lehanăn bi mlih mơ̆ng ana kyâo điêt jing ana kyâo prŏng. Kah knar grăp thŭn, alŭ wăl anei mkăp mơ̆ng 1,5 – 2 êklai prăk đru kơ mnuih ƀuôn sang mkra mđĭ hnơ̆ng tŭ jăk dliê pla, lu jing pla ana kyâo prŏng. Kdriêk Đông Giang đru leh kơ mnuih ƀuôn sang pla êbeh 500 ha dliê prŏng hŏng lu mta ana mâo hnơ̆ng tŭ jăk msĕ si dổi mtah, lim mtah, êgiêr, ươi, huỳnh đàn… Kdriêk Đông Giang gĭr ktưn truh kơ thŭn 2025 mđĭ ênhă dliê pla ana kyâo prŏng truh 4.500 ha. Đỗ Hữu Tùng, kơiăng khua Anôk bruă sang čư̆ êa kdriêk Đông Giang brei thâo:

“Anei jing hdră êlan djŏ klă mŏng kdriêk lehanăn mŏng čar kñăm mđĭ ai mnuih ƀuôn sang čuăl mkă krĭng pla dliê mjing ưăl anôk dliê ƀrư̆ hruê ƀrư̆ đĭ kyar. Kluôm kdriêk mtrŭt mjhar mnuih ƀuôn sang pla sa thŭn ƀiă êdi 300 ha dliê kyâo prŏng hŏng dŭm mta ana mâo gáo vàng, ana juăr, ana êgiêr, wăt ana mtŭk kñăm krŏng kjăp ưăl anôk dliê mơ̆ng anăn dưi gang mkhư̆ klei klưh hroh lăn, klei adiê yan êa lip lêč, yan adiê ngă. Mơ̆ng anăn mnuih ƀuôn sang dưi răng mgang lehanăn kriê dlăng dliê jăk hĭn, mđĭ kyar bruă duh mkra, msir klei ư̆ êpa, bi hrŏ klei ƀun knap. Êdei anei boh tŭ bruă pla ana kyâo prŏng lu hĭn lehanăn ba wĭt hnư hrui wĭt hơĭt kjăp kơ mnuih ƀuôn sang. Klei đĭ kyar srăng mâo kluôm kdriêk.

Ti dŭm kdriêk krĭng čư̆ čhiăng čar Quảng Nam mâo dŭm êtuh gŏ sang mnuih djuê ana Ktu nao hgŭm mđĭ kyar bruă pla ana mtŭk lehanăn mâo hnư hrui wĭt kjăp. Quảng Nam ba mdah leh lu hdră mtrŭn mđĭ ai mnuih pla dliê bi mlih mơ̆ng bruă pla ana kyâo điêt pla kyâo prŏng đru kơ mnuih ƀuôn sang mđĭ kyar bruă duh mkra êjai đru răng mgang wăl hdĭp mda êjai. Dưi thâo, čar Quảng Nam mâo êbeh 769.000 ha dliê lehanăn lăn čuăl mkă mđĭ kyar dliê. Grăp thŭn, hnơ̆ng kyâo dliê mkăp kơ bruă blei yua hlăm ala čar lehanăn ba čhĭ kơ ala tač êngao hlăm brô 1,45 êklăk m3, đru mjing bruă mă, đru kơ mnuih ƀuôn sang tlaih kơ ƀun kjăp./.