Leh dŭm hruê mdrao mgŭn djŏ si klei ktrâo lač mơ̆ng anôk bruă mdrao mgŭn mnơ̆ng rông, êpul êmô mơ̆ng gŏ sang Nguyễn Đình Sơn, ti alŭ Bồng Lai, să Hiệp Thạnh, kdriêk Đức Trọng suaih hĭn leh. Êngao kơ 2 drei ruă kjham djiê leh, êbeh dŭm pluh drei êmô adôk dưi lŏ ƀơ̆ng rơ̆k leh. Khă snăn, klei Nguyễn Đình Sơn dôk mđing uêñ jing êmô huĭ srăng lŏ mâo klei ruă.

 “Tlŏ vaccine hruê 25/7, truh kơ hruê 2/8 êmô amâo đei ƀơ̆ng mnơ̆ng, truh kơ hruê 4/8 êmô amâo lŏ ƀơ̆ng mnơ̆ng ôh. Wưng mâo klei ruă kjham hĭn, ruă tian eh m’êa jing hruê 7/8 hlŏng truh kơ hruê 9/8, hlăk anăn 2 drei êmô djiê. Ară anei, êpul êmô ƀơ̆ng ƀiă leh, khă snăn mâo 1 drei lŏ ruă gưl tal 2, hlăm wang 3 hruê anei amâo čiăng ƀơ̆ng mnơ̆ng ôh.

Msĕ snăn, êngao 4 drei djiê leh, 22 drei êmô mă êa ksâo mơ̆ng gŏ sang Lê Thị Ánh Hồng, alŭ Bồng Lai, să Hiệp Thạnh, kdriêk Đức Trọng (čar Lâm Đồng), mrâo găn wưng huĭ hyưt mơh. Mâo dŭm drei lŏ ƀơ̆ng leh mnơ̆ng. Hluê si Hồng, bruă êlâo hĭn jing mâo klei kčah mtrŭn bruă đua klam, đru mdul klei luič liê kơ mnuih rông mnơ̆ng.

 “Hlei pô mkra êa drao anăn brei đua klam hŏng mnuih ngă lŏ hma, brei čiu hnô mâo hdră đru kơ mnuih ƀuôn sang. Ară anei, lač klei ruă ƀiădah ti nao djŏ mă klei ruă? Êmô kâo êlâo anăn amâo djăp rơ̆k čiêm ƀiădah leh wĭt tlŏ jih jang bi ruă s’aĭ. Ară anei dôk 2 – 3 drei amâo čiăng ƀơ̆ng mnơ̆ng. Ară anei, dŭm drei mdrao hlao leh ƀiădah mâo dŭm drei lŏ ruă gưl dua, lŏ ruă hlŏng djiê yơh.

   Tĭng truh kơ jih hruê 12/8, čar Lâm Đồng mâo 5.350 drei êmô mă êa ksâo ruă tian eh m’êa lehanăn 237 drei êmô djiê, lu ti 2 kdriêk Đơn Dương lehanăn Đức Trọng. Anei jing dŭm drei êmô dưi tlŏ vaccine NAVET-LPVAC gang mkhư̆ klei ruă bŏk gŭ klĭt, hlăm wưng mơ̆ng hruê 22 truh kơ hruê 31/7/2024.

  Hluê si Hoàng Sỹ Bích, Khua knơ̆ng bruă Lŏ hma lehanăn mđĭ kyar krĭng ƀuôn sang čar Lâm Đồng, vaccine NAVET-LPVAC gang mkhư̆ klei ruă bŏk gŭ klĭt mâo Anôk bruă mkra mjing êa drao mdrao mgŭn mnơ̆ng rông gưl dlông (NAVETCO) mkăp. Hdră mkăp vaccine rơ̆ng djăp ênŭm klei kčah mtrŭn mơ̆ng hdră bhiăn. Hoàng Sỹ Bích brei thâo, khădah mâo klei bi mklă tal êlâo vaccine hmăi amâo jăk truh kơ êmô ngă klei ruă tian eh m’êa, khă snăn, anei djŏ mơ̆ jing mta phŭn ngă êmô djiê brei mâo klei ksiêm bi mklă mơ̆ng anôk bruă djŏ tuôm.

“Mơ̆ng ênoh ksiêm dlăng truh kơ ară anei, jih êmô mă êa ksâo mâo klei ruă dôk hlăm ênoh mâo tlŏ leh vaccine bŏk gŭ klĭt, bi dŭm drei amâo mâo tlŏ ăt suaih, amâo ruă. Khă snăn, pô ka thâo klă ôh, brei mâo klei ksiêm bi mklă mơ̆ng anôk bruă djŏ tuôm, brei hưn mthâo klă hŏng hră m’ar. Hmei ăt brei anôk bruă djŏ tuôm ksiêm bi mklă klei anei. Tơdah mta phŭn kbiă hriê mơ̆ng vaccine hmei srăng brei anôk bruă duh mkra čiu hnô kơ mnuih ƀuôn sang.

Êngao 2 kdriêk Đơn Dương lehanăn Đức Trọng, kdriêk Lâm Hà lehanăn ƀuôn prŏng Bảo Lộc mơ̆ng čar Lâm Đồng ăt čih yap mâo êmô ruă tian eh m’êa leh tlŏ vaccine gang mkhư̆ klei ruă bŏk gŭ klĭt. Hlăm anăn, ti kdriêk Lâm Hà mâo leh 2 drei êmô mă êa ksâo djiê. Ară anei, hdră gang mkhư̆ klei ruă ti êpul êmô mă êa ksâo čar Lâm Đồng dôk mâo anôk bruă mdrao mgŭn mơ̆ng rông mơ̆ng gưl dlông lehanăn alŭ wăl pŏk ngă./.