Anei jing hdră mâo klei pah mni mrô 1 êpul hđeh sang hră gưl prŏng hlăm klei bi lông “Hđeh sang hră, hđeh sang hră gưl prŏng hŏng klei mĭn čô̆ kơ bruă” tal 5 mơ̆ng Phŭn bruă mtô mjuăt bi hriăm mkŏ mjing.

Hdră bruă ECO-HOUSE mâo 3 čô sinh viên ngă bruă hlăm 3 bruă mdê mdê jing Hồ Thanh Huy, khua êpul, sinh viên thŭn tal 4 bruă mrâo mrang điện tử, Lê Hoàng Minh Châu - thŭn tal 4 bruă kriê dlăng mnia blei leh anăn Trần Thị Trâm (thŭn tal 3 bruă mnia blei - hiu čhưn ênguê) ti gŭ klei ktrâo lač mơ̆ng Nai prŏng Thái Duy Tùng (nai mtô bruă hriăm kơ ngăn prăk knơ̆ng prăk) hlue ngă. Bi mĭn msĕ si 3 bruă hriăm amâo djŏ tuôm ôh, ƀiădah 3 čô sinh viên bi mguôp mbĭt čiăng mjing sa hdră mphŭn čô̆ kơ bruă hlăm bruă lŏ hma, dliê kmrơ̆ng, kan hdang.

Mnơ̆ng dhơ̆ng mơ̆ng êpul jing kdrăp điêt dưm ti sang bi mguôp hŏng kdrăp ba yua mơ̆ng kbưi hlăm đĭng blŭ, hlăm anăn mâo hdră ktuê dlăng dŭm ênoh mrô yuôm bhăn msĕ si hnơ̆ng adiê, hnơ̆ng hơuh, hnơ̆ng êa, mnơ̆ng tŭ jăk hlăm lăn, hnơ̆ng N-P-K, pH... Mơ̆ng anăn čiăng thâo kơ klei amâo jăk leh anăn pral hưn brei răng čiăng hmao msir mgaih, bi hrŏ klei amâo myun kơ ƀĭng ngă lŏ hma, mdrơ̆ng hŏng klei bi mlih yan adiê, mđĭ hnơ̆ng mnơ̆ng dhơ̆ng leh anăn mkiêt mkriêm pui kmlă, êa jua…

Hồ Thanh Huy brei thâo, mơ̆ng bruă ktuê dlăng, dŭm đang pla mjing, ƀĭng ngă lŏ hma ară anei dưi hưn mthâo dŭm mta mnơ̆ng dhơ̆ng mâo phŭn agha mơ̆ng China, amâo mâo ôh klei jăk kơ ƀĭng ngă lŏ hma. Kyua anăn, êpul mkra mjing leh mnơ̆ng dhơ̆ng mâo klei mkra ênưih, jăk kơ grăp čô dưi yua sơăi. Diñu ăt thâo săng brei pô yua klei thâo dưi hriăm leh čiăng yua kdrăp mrâo hlăm bruă lŏ hma, đru kơ ƀĭng ngă lŏ hma mđĭ ênoh yuôm mnơ̆ng dhơ̆ng lŏ hma dưi ñĕ kơ klei luč yan boh mnga, luč ênoh, hrŏ ênoh mơ̆ng phung mnia blei. Thanh Huy yăl dliê:

       “Hmei mơ̆ng gŏ sang ngă lŏ hma leh anăn hriê kơ prŏng ti kwar Yŭ, amâo ngă hma ôh ƀiădah hmei thâo săng, leh anăn thâo si hdră ngă lŏ hma. Êngao anăn hmei lŏ mâo phung găp hriăm kơ bruă lŏ hma, diñu srăng đru hmei čiăng mâo mnơ̆ng dhơ̆ng đru kơ ƀĭng ngă lŏ hma. Kyua anăn hmei wĭt duah klei găl ti alŭ wăl pô.”

 Mơ̆ng hră čih kơ bruă pla mjing, ECO-HOUSE srăng mdah hdră msir “lŏ nhma doh amâo huĭ kơ klei klă mngač” mơ̆ng bruă lŏ hma mrâo IoAT (Internet jih jang mnơ̆ng) hŏng lu klei ruah. Klă klơ̆ng hdră bruă mguôp hŏng hnơ̆ng kčah “sa êa, dua hbâo pruê, tlâo klei kreh kriăng” jing msir mgaih kơ klei krih êa mkiêt mkriêm, ktuê dlăng mnơ̆ng tŭ jăk kơ lăn amâodah kluôm ênŭm mâo krih êa mkiêt mkriêm, mnơ̆ng tŭ jăk kơ ana pla mjing, hdră msir kluôm ênŭm kơ ana pla mjing mâo hnơ̆ng djŏ guôp hŏng ngăn prăk leh anăn klei čiăng mơ̆ng đang pla mjing.

       Lê Hoàng Minh Châu jing phung hlăm êpul, phung hlăm hdră bruă mđing kơ ƀĭng ngă lŏ hma leh anăn dŭm êpul hgŭm bruă, êlâo hĭn jing lông ngă hŏng dŭm mta ana pla mjing msĕ si durian, boh táo, boh dŭng ti Tiền Giang, Bến Tre leh anăn jing đang mnga pôk ti Vũng Tàu. Hlăm hdră hlue ngă, phung găp ăt tuôm hŏng lu klei dleh dlan msĕ si ka mâo klei thâo kơ anôk ba čhĭ, ka mâo klei thâo êlam kơ djăp mta ana pla mjing, kyua anăn phung găp ăt ksiêm hriăm kơ hdră mkra mjing čiăng mâo hdră msir jăk hĭn:

     “Ară anei mnuih ƀuôn sang dôk rŭng kơ klei ba yua, ƀiădah klei mĭn ba yua mâo klei bi mlih mơ̆ng mnơ̆ng hđăp jing mrâo snăn mnuih ƀuôn sang dôk huĭ. Mơ̆ng anăn, hmei mâo hdră msir jing mơ̆ng dŭm bruă hđăp čiăng mđĭ kyar thiăm amâo lăm lui jih ôh klei hđăp”

        Hlue si nai prŏng Thái Duy Tùng, nai mtô ktrâo lač akŏ, klei mdê mơ̆ng hdră bruă anei mkă hŏng lu bruă mkăn jing bruă phung sinh viên ba yua boh sĭt čiăng lông ngă gru hmô ti grăp anôk lăn, ksiêm hriăm klei čiăng, klei mưng pla mjing mơ̆ng mnuih ƀuôn sang. Wăt tơdah phung hlăm êpul amâo mâo klei thâo kơ ƀĭng lŏ hma ƀiădah hŏng klei găl jing hriê mơ̆ng kwar Yŭ, bi mguôp hŏng klei thâo kơ bruă lŏ hma leh anăn klei đru mơ̆ng phung sinh viên dôk hriăm bruă lŏ hma ti sang hră gưl prŏng Tiền Giang, phung găp dưi mâo klei tŭ msĕ si hruê anei:

     “Bruă ară anei jing tơdah duah phung blei snăn dôk tuôm hŏng klei dleh dlan kyua ka mâo anăn knăl, khădah snăn phung găp ăt mâo lu klei bi mguôp hŏng anôk pla mjing, klei čang hmăng kơ êdei anăp phung găp srăng ƀrư̆ ƀrư̆ giăm hĭn hŏng anôk ba čhĭ”.

 Hŏng hdră bruă anei, êpul čang hmăng mđĭ kyar leh anăn duah prăk hrui wĭt mơ̆ng lu phŭn prăk amâo djŏ knŏng mơ̆ng mnơ̆ng dhơ̆ng ôh ƀiădah kbưi hĭn lŏ kčĕ mkra mjing leh anăn mkăp hdră msir, mơ̆ng mnơ̆ng dhơ̆ng lŏ hma leh anăn dŭm mta mnơ̆ng dhơ̆ng mkra mjing. Čang hmăng mơ̆ng jih êpul jing mđĭ ênoh yuôm mnơ̆ng dhơ̆ng lŏ hma Việt, hưn mdah dŭm ênoh mrô mơ̆ng hdră pla mjing čiăng arăng blei thâo kơ mnơ̆ng dhơ̆ng ti anôk pla mjing, hnơ̆ng lăn si ngă, mâo êa drao mơ̆ amâodah hơăi. Hồ Thang Huy hơ̆k mơak lač:

        Hmei bi lač pô jing anak phung hiu čhĭ djam, hmei čhĭ mnơ̆ng dhơ̆ng lŏ hma leh anăn mâo kdrăp mrâo čiăng đru kơ bruă čhĭ mnơ̆ng dhơ̆ng lŏ hma anei, čang hmăng srăng tŭ jing leh anăn anôk ba čhĭ srăng tŭ mă.”

        Nai prĭn Nguyễn Quốc Cường, K’iăng Khua bruă mnia blei- hiu čhưn ênguê sang hră gưl prŏng bruă tuh tia mkra mjing ƀuôn prŏng Hồ Chí Minh lač, anei jing akŏ jăk đru kơ ƀĭng ngă lŏ hma pla mjing jăk hĭn hlăm krĭng pô leh anăn răng mgang wăl hdĭp mda, bi hrŏ bruă bi mjhua hbâo pruê, êa drao krih kơ ana pla mjing:

        “Kơ tĭng anôk bruă srăng kčĕ kơ klei thâo ngă jih hnơ̆ng čiăng kơ phung găp lŏ dơ̆ng ngă hdră brua anei jing anôk bruă spin-off mâo ênoh yuôm kơ êpul êya, boh nik êpul êya mđĭ kyar bruă lŏ hma hlue hdră mrâo mrang.

 Dŭm hdră bruă mphŭn čô̆ kơ bruă mơ̆ng hđeh sang hră, sinh viên čiăng dưi ba yua leh anăn mđĭ kyar hĭn, phung găp ăt čiăng mơh klei tŭ mă, nao ai leh anăn đru amâo djŏ knŏng hjăn sang hră ôh ƀiădah wăt ala ƀuôn. Mơ̆ng anăn dưi đru lu hĭn kơ akŏ mphŭn čô̆ kơ bruă đru kơ klei đĭ kyar lăn čar./.