Gŏ sang amai Đàm Thị Thảo (ti ƀuôn Bản Hoàng, să Trường Hà, kdriêk Hà Quảng, čar Cao Bằng) jing sa hlăm dŭm gŏ sang dưi dưn klei tŭ mơ̆ng hdră sang ñuăl čiăng pla kmŭn. Hŏng êbeh 100 êklăk prăk hlăm kngan, mbĭt hŏng klei đru truh 150 êklăk prăk mơ̆ng knŭk kna, gŏ sang amai duh kơ kdrăp yua leh anăn đa đa mnơ̆ng yua lŏ hma čiăng mkŏ mjing klei bi hmô pla kmŭn hlăm sang ñuăl. Amai Đàm brei thâo, klei bi hmô mâo ênhă 1.000m2, yua hŏng kdrăp krih aruăt êa hŏng 2.000 phung kmŭn, phŭn mkai. Hlăm klei lông pla ƀuh ana đĭ hriê jăk êdi, mnga siam leh anăn boh prŏng, boh đuôm mâo êbeh 90%.

Pla kmŭn hlăm sang ñuăl, wưng pla phŭn pô srăng pla kmŭn tuk nhô leh anăn kmŭn tuk wil, bi kơ wưng mkăn srăng pla kmŭn gơ̆ng boh đ’điêt. Grăp thŭn pla 3 wưng, mă hĕ ênoh bi liê mâo mnga êbeh 200 êklăk prăk. Leh dưi nao hlăm adŭ bi hriăm kơ bruă pla mjing hlăm sang ñuăl kâo dưi thâo wưng pla mjing djŏ guôp čiăng mâo boh lu hĭn, ăt msĕ hŏng ana ktơr, ana mdiê.

Hdră pla mjing hlăm sang ñuăl leh anăn krih aruăt êa đru kơ ana pla mjing amâo mâo guôn knang kơ mđiă hjan leh anăn bi hrŏ klei mnơ̆ng ngă. Amâo djŏ knŏng sơnăn, ƀĭng ngă lŏ hma dưi bi hrŏ ênoh bi liê kyua amâo mâo guôn krih êa drao, rơ̆ng kơ mnơ̆ng dhơ̆ng doh êƀăt leh anăn jăk hŏng klei suaih pral wăt phung pla mjing leh anăn phung ba yua. Boh tŭ dưn mơ̆ng klei bi hmô mkŏ mjing boh kdrŭt kơ mnuih ƀuôn sang jhŏng duh bi liê, dưn yua kdrăp mrâo mrang hlăm bruă lŏ hma ti alŭ wăl. Ăt mâo klei đru pla kmŭn hlăm sang ñuăl, ayŏng Nguyễn Văn Quảng ti ƀuôn Bản Chá, să Ngọc Đào, kdriêk Hà Quảng, čar Cao Bằng) brei thâo:

Gŏ sang kâo pla kmŭn tuk, kmŭn gơ̆ng. Phŭn mjeh mâo hdră đru leh, kâo knŏng blei mă hlăm dŭm wưng pla êdei. Mphŭn ngă bruă anei, phung knuă druh mơ̆ng hdră hriê mtô pla mjing leh anăn hdră kriê dlăng. Pla hlăm sang ñuăl tơdah pô ngă djŏ hŏng klei mtô ăt ênưih mơh. Pla kmŭn sơnei grăp thŭn mâo 3 wưng. Tơdah kriê dlăng jăk srăng mâo ênoh hĭn mkă hŏng dŭm ana pla mjing mkăn.

Mơ̆ng dŭm boh tŭ dưn dưi mâo, lu gŏ sang ti dŭm să mkăn nao hriăm, jhŏng duh bi liê, mkăp ngăn prăk mbĭt hŏng klei đru mơ̆ng bruă sang čư êa čiăng mkŏ wĭt klei bi hmô bruă duh mkra. Đàm Quang Đạo, khua êpul hgŭm ƀĭng ngă lŏ hma să Ngọc Đào, kdriêk Hà Quảng, čar Cao Bằng brei thâo: Dŭm klei bi hmô pla mjing dưn yua kdrăp mrâo mrang ti alŭ wăl dưi hmao tui tiŏ hdră tă leh anăn klei čiăng mơ̆ng anôk mnia mblei ară anei.

Thŭn 2022, kdriêk Hà Quảng đru kơ să Ngọc Đào 3 boh sang ñuăl hluê hdră ngăn prăk đru mơ̆ng knŭk kna 50%. Thŭn tal êlâo ngă hdră knŭk kna đru brei mjeh leh anăn hdră mnêč kriê dlăng. Hlăm wưng kơ anăp, êpul bruă srăng lŏ hâo hưn kơ mnuih ƀuôn sang pŏk mlar klei bi hmô bruă lŏ hma doh, yua kdrăp mrâo mrang, mđĭ hnư hrui wĭt hlăm sa ênhă lăn, đru bi hrŏ ƀun, gĭr ktưn jing mnơ̆ng dhơ̆ng OCOP.

Klei bi hmô pla kmŭn hlăm sang ñuăl, krih hŏng aruăt êa dôk pŏk êlan nao mrâo hlăm bruă lŏ hma ti alŭ wăl. Anei jing klei găl đru kơ ƀĭng ngă lŏ hma dưi hriăm, dưn yua hdră mnêč mrâo mrang čiăng mkŏ mjing mnơ̆ng dhơ̆ng doh êƀăt leh anăn jăk hŏng klei suai pral phung blei ba yua.