Rông kan hŏng war mơ̆ng Đinh Văn Thắng dôk hlăm krah êlah êa ti ênao phŭn pui Đắk R’Tih hlăm wăl êngao ƀuôn prŏng Gia Nghĩa, čar Dak Nông. Ñu brei thâo, ênao êa phŭn pui anei jing doh, jăk êdi hŏng bruă rông kan msĕ si kan êbŭng, kan hyao, kan kruă, kan kur... kah knar grăp thŭn gŏ sang ñu mâo ba wĭt mơ̆ng 500 -700 êklăk prăk mơ̆ng dua boh war rông:

 “Êa ênao jing doh, kyuadah êa anei mâo hnoh đoh đuĕ hriê mơ̆ng anôk doh. Klei rông kan knŏng liê hlăm wưng tal êlâo đuič, mghaih msir jih jang bruă tal êlâo, leh êgao mơ̆ng 10 - 15 hrue, kan mưng leh hŏng êa snăn amâo lŏ mâo klei djiê ôh”.

Kbưi hŏng Gia Nghĩa hlăm brô 100 km, hlăm hnoh Krông Knô, mơ̆ng lu thŭn hŏng anei leh, gŏ sang Bùi Văn Xô, ti să Ƀuôn Čuah, kdriêk Krông Knô rông mâo truh 15 boh war rông kah kruă hrah. Ñu yăl dliê, grăp thŭn gŏ sang ñu mâo ba wĭt hlăm brô 120 tôn kan, leh kah hĕ jih kơ ênoh bi liê mâo ba wĭt prăk mnga giăm 400 êklăk prăk. Alŭ wăl anei êa prŏng, hnơ̆ng êa đoh jing jăk hŏng bruă rông kan, khădah ăt kreh tuôm mơh hŏng lu klei amâo mâo jăk:

Klei dleh dlan jing hlăm yan hjan êa đĭ. Snăn kan ênưih tuôm hŏng klei djiê hngăt êa êkăl; tal dua yan bhang không êa hrŏ, hnơ̆ng êa đoh amâo mâo jăk găl kan kăn đĭ hriê kơ prŏng rei. Rông kan ară anei jing dôk duah mjeh dleh snăk.

  Čar Dak Nông mâo ênhă êlah êa pioh rông kan truh 17.500 ha, hŏng dŭm ênoh ênao êa mơ̆ng phŭn pui msĕ si Ƀuôn Tua Srah, Buôn Kuôp, Đồng Nai 3, Đồng Nai 4, Dak R’tih, mbĭt hŏng 250 ênao êa lehanăn dŭm bĭt êa hnoh prŏng. Truh kơ ară anei, ênhă êlah êa rông kan hlăm čar mâo giăm 2000 ha, hŏng hlăm brô 1.200 boh war rông kan, hŏng ênoh dưi mâo truh 7.300 tôn grăp thŭn. Tui si Ngô Xuân Đông, K’iăng khua knơ̆ng bruă lŏ hma čar Daknông, ară anei dôk mâo lu klei dleh kpăk hlăm bruă rông kan hlăm čar, kyua kƀah klei bhiăn, čiăng mâo hdră êlan rông bi jăk ti dŭm ênao mgơ̆ng êa, lehanăn ka mâo mơh hdră êlan čoh čuăn ya mta kan rông jing jăk hĭn. Bruă lŏ hma hlăk dôk duah hdră ruh mgaih klei dleh dlan kơ bruă rông kan hŏng klei kjăp, lehanăn răng mgang klei doh kơ êa jua.

Tal êlâo jing lŏ ksiêm wĭt jih jang klei bhiăn mă bruă lehanăn mâo hră êlan ksiêm duah klei bhiăn čiăng djăp klei găl kơ bruă rông kan ti ênao mgơ̆ng êa mơ̆ng phŭn pui, amâodah hlăm hnoh krông Knô. Tal dua, jing klei mjuăt bi hriăm hdră rông, lehanăn pŏk mlar bruă rông kan mâo klei tŭ dưn hĭn mơ̆ng bruă rông kan hlăm êa kba”.

Hŏng lu ênao knơ̆ng êa mâo, hŏng êa đoh jing doh siam. Čar mâo leh ênoh čuăn ktưn truh thŭn 2030, ênoh ênhă êlah êa rông kan mâo truh 4.500 ha, hŏng ênoh kan dưi mâo truh 20.000 tôn./.