Jing gŏ êsei mnuih Khmer ƀun, dua ung mô̆ Huỳnh Thị Cẩm Tú lehanăn Thạch Thường ti alŭ Vĩnh Thanh, să Vĩnh Quới bi nao kơ Bình Dương mă bruă. Leh bluh mâo klei ruă Covid 19 hlăm thŭn 2021, ung mô̆ ñu wĭt kơ ƀuôn sang, mâo amĭ ama mbha lăn mdơ̆ng sang, hiu mă bruă mưn. Dŭm thŭn amâo mâo êdeh êdâo êrô êbat klei hdĭp tuôm hŏng lu klei dleh dlan. Kyua anăn, leh djŏ ruah mâo hdră đru 10 êklăk prăk, ung mô̆ ñu blei leh êdeh p’phŭt kăp êrô êbat lehanăn hiu čhĭ boh kroh. Huỳnh Thị Cẩm Tú, brei thâo, mâo êdeh anei, bruă čhĭ mnơ̆ng gŏ sang mâo leh klei jăk găl hĭn.

 Gŏ sang kâo hnư hrui wĭt amâo h’ĭt, amâo mâo prăk duh bi liê, amâo mâo êdeh êdâo hiu čhĭ, leh mâo knŭk kna đru dưi blei sa boh êdeh p’phŭt ngă kdrăp hiu čhĭ mnơ̆ng, kâo hlŏng hiu čhĭ mnơ̆ng djăp anôk yơh. Sa mlan mâo mơh mơ̆ng 7 – 8 êklăk prăk, čhĭ mkai, jih yan mkai čhĭ mnơ̆ng mkăn msĕ si djam bei msăm, boh ksâo êmô, boh truôl. Gŏ sang kâo lač jăk êdi kơ Đảng, Knŭk kna đru prăk kăk kơ gŏ sang, 2 ung mô̆ kâo srăng gĭr tlaih ƀun, čang hmăng klei hdĭp srăng đĭ kyar hĭn.

Bi Sơn Thị Lùng, ti alŭ Vĩnh Thành, să Vĩnh Quới, hŏng 10 êklăk prăk đru mơ̆ng Hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă, ñu blei leh sa drei ŭn ana mđai, lŏ mkra war rông lehanăn blei mnơ̆ng ƀơ̆ng kơ ŭn hlăm dŭm mlan tal êlâo. Ba yua klei găl lăn huâng ti tluôn sang, ñu lŏ pla djam ngă mnơ̆ng ƀơ̆ng kơ ŭn. Leh 4 mlan rông, ñu mprăp čhĭ leh ŭn gưl tal êlâo, hŏng 13 drei, đăo tĭng mâo êbeh 20 êklăk prăk.

 Dưi đru snei kâo m’ak êdi yơh. Ară anei ŭn mâo êbeh 10 drei leh lehanăn kâo čhĭ jih mtam. Kâo rông dlăng kriê kjăp snăk, hnư hrui wĭt đru gŏ sang kâo mâo klei hdĭp h’ĭt kjăp hĭn.

Hŏng hdră đru kơ bruă duh mkra, bi mlih bruă mă kơ mnuih djuê ƀiă, hlăm dŭm thŭn giăm anei mâo wăl krah Ngã Năm, čar Sóc Trăng mđing hluê ngă lehanăn ba wĭt leh boh tŭ dưn klă sĭt. Hlăm wưng êgao, wăl krah mđing mtrŭt mđĭ bruă pŏk ngă dŭm hdră bruă…. Hlăm hdră ala čar kñăm mđĭ kyar bruă duh mkra – ala ƀuôn hlăm krĭng mnuih djuê ƀiă lehanăn krĭng čư̆ čhiăng, wưng thŭn 2021 – 2030, hlăm anăn, mâo hdră đru bi mlih bruă mă kơ mnuih ƀuôn sang djuê ƀiă, ƀrư̆ đru kơ gŏ sang mnuih djuê ƀiă mâo klei găl duh ƀơ̆ng, mđĭ hnư hrui wĭt, ƀrư̆ bi h’ĭt klei hdĭp mnuih ƀuôn sang.

Truh ară anei, hdră đru leh lăn dôk kơ 1 gŏ sang hŏng ênoh prăk 44 êklăk; đru sang dôk kơ 35 gŏ sang hŏng êbeh 1,5 êklai prăk; đru bi mlih bruă mă kơ 87 gŏ sang hŏng 767 êklăk prăk; đru êa doh yua kơ 9 gŏ sang hŏng 27 êklăk prăk. Êngao anăn, alŭ wăl mâo hluê ngă leh 2 gru hmô mđĭ kyar bruă pla mjing, bi lu jơr hdră duh mkra hlăm êpul êya, mâo gru hmô rông bip mjeh Prăng, kan kruah ti alŭ Vĩnh Thuận, să Vĩnh Quới lehanăn gru hmô rông bip mjeh Prăng ti alŭ Long Thành, să Tân Long hŏng 343 êklăk prăk lehanăn srăng lŏ pŏk mlar hlăm thŭn 2024. Huỳnh Văn Lơ, Khua adŭ bruă mnuih ngă bruă, kahan êka êkeh lehanăn yang ƀuôn wăl krah Ngã Năm brei thâo:

Lŏ dơ̆ng đru kčĕ kơ Anôk bruă sang čư̆ êa wăl krah, pŏk ngă ênŭm hdră kčah lehanăn hluê ngă djăp ênŭm hdră bi hrŏ ƀun h’ĭt kjăp, hdră mđĭ kyar bruă duh mkra – ala ƀuôn krĭng mnuih djuê ƀiă lehanăn krĭng čư̆ čhiăng, mđing bi mlih bruă mă, mjuăt bi hriăm bruă krĭng ƀuôn sang čiăng mâo lu mnuih thâo kơ bruă, ba wĭt prăk kăk mđĭ kyar bruă duh mkra gŏ sang.

Hdră msir mghaih klei kƀah lăn dôk, sang dôk, bruă mă lehanăn êa yua mâo bruă klam yuôm bhăn, kñăm mjing klei găl kơ dŭm gŏ sang mnuih Khmer ƀun dưi bi mjĕ, bi mlih bruă, mkra mđĭ klei hdĭp mda. Kyua anăn, hdră pŏk ngă dôk mâo čar Sóc Trăng lehanăn wăl krah Ngã Năm mđing hluê ngă, rơ̆ng djŏ mnuih, djŏ guôp, čiăng kơ dŭm gŏ sang mâo klei găl kpưn đĭ, đru bi mlih klei hdĭp, bruă duh mkra – ala ƀuôn krĭng mnuih djuê ƀiă hlăm wưng ti anăp./.