Hlăm hruê mmông Ƀuôn Ama Thuôt hyuă kjăp bruă êrô êbat hlăm 5 hruê čiăng jih ai ngă bruă ksiêm mkă hmar kman Sars CoV 2, bruă sang čư̆ êa, lu knơ̆ng bruă, anôk bruă mnia mblei čŏng ngă leh bruă mkra mjing, mkăp brei lehanăn ba mnơ̆ng ƀơ̆ng huă truh kơ kngan mnuih ƀuôn sang.

Mơak kyua mâo tŭ mă anŭng mnơ̆ng đru mâo djam mtam, kđeh čĭm, boh mnŭ mơ̆ng Êpul kiă kriê bruă gang mkhư̆ klei ruă tưp mơ̆ng Êpul anôk dôk mrô 7, ƀuôn hgŭm Tân An, ƀuôn prŏng Ƀuôn Ama Thuôt nao blei brei mnơ̆ng, amai Trần Thị Hằng ti êlan Nguyễn Xuân Nguyên brei thâo, gŏ sang amai mâo mbha hră pioh blei mnơ̆ng sang mnia hlăm mlan 26/8. Aguah ưm hrue 27/8, amai mơĭt mtam hră anăn kơ êpul zalo ƀuôn hgŭm, lehanăn mâo tŭ mă mnơ̆ng pô čiăng hlăm tlam anăn mtam:

“Kâo ƀuh bruă ƀuôn hgŭm ngă klei nao blei brei mnơ̆ng ti sang mnia kơ phung ƀuôn sang êjai ƀuôn prŏng dôk ba yua asăp mtrŭn mrô 16 čiăng gang mkhư̆ klei ruă tưp hŏng klei tŭ dưn. Ya mta mnơ̆ng hmei čiăng blei, knŏng alo akâo kơ ƀuôn hgŭm đru srăng mâo mtam mnuih nao blei brei, lehanăn djă ba truh kơ sang pô, čiăng kơ găp djuê yua êjai hlăm wưng dôk mkhư̆ gang klei ruă tưp. Kâo ƀuh êpul êdam êra, lehanăn phung amai adei mniê hur har êdi duh mĭn kơ phung ƀuôn sang”.

Ƀuôn prŏng Ƀuôn Ama Thuôt mâo ngă leh klei bi ktlah yang ƀuôn hlue asăp mtrŭn mrô 16 mơ̆ng 6h tlam hrue 26/8. Hlue anăn, hlăm 5 hrue tal êlâo, ƀuôn prŏng mtă kơ jih jang mnuih amâo mâo dưi kbiă mơ̆ng sang ôh, čiăng ktuh êyuh jih jang bruă kơ klei mkă dlăng kman test hŏng klei pral kơ jih jang giăm 375 êbâo čô mnuih, kñăm pral dưi ksiêk bi mjih F0 kbiă đuĕ mơ̆ng yang ƀuôn. Hlăm wưng anei, knơ̆ng bruă sang čư̆ êa ƀuôn prŏng jao leh kơ dŭm să, ƀuôn hgŭm mkŏ mjing “Anôk mkăp mnơ̆ng amâo mâo liê prăk ôh” pioh đru kơ dŭm gŏ êsei dleh dlan, lehanăn mâo dŭm bruă ngă “Đru nao blei brei mnơ̆ng kơ phung ƀuôn sang”. Ngă hdră anei ti ƀuôn hgŭm Thống Nhất, Nguyễn Khắc Sơn, Khua bruă Đảng hlŏng jing khua Êpul anôk dôk mrô 1, brei thâo:

“Dŭm gŏ êsei phung ƀuôn sang mâo mbha hră nao sang mnia mbĭt hŏng nah tluôn čih klă ênŭm klei mtă kơ mnuih yua hưn bi nik ya mta mnơ̆ng pô čiăng blei ti pŏk nah tluôn. Phung ƀuôn sang mă rup ênoh mnơ̆ng pô čiăng leh čih hlăm mơar lehanăn mơĭt kơ êpul zalo hlăm êpul anôk hmei dôk. Êpul kiă kriê anôk dôk anăn bi klin lehanăn mơĭt kơ knơ̆ng bruă sang čư̆ êa ƀuôn hgŭm, čiăng kơ bruă sang čư̆ êa ngă bruă blei mprăp brei kơ phung ƀuôn sang”.

Mkŏ mjing Êpul gang mkhư̆ klei ruă Covid-19 hlăm êpul êya đru kơ mnuih ƀuôn sang ƀuôn Ama Thuôt nao blei djam hlăm sang mnia

Anôk mdê hlăm bruă mkăp mnơ̆ng mnuă kơ phung ƀuôn sang hlăm wưng anei, jing gưl tal êlâo, dŭm boh sang mnia prŏng, anôk mnia mblei hlăm ƀuôn prŏng Ƀuôn Ama Thuôt ngă bruă čhĭ mnơ̆ng hlue “combo mnơ̆ng ƀơ̆ng aguah tlam” mâo leh hŏng ênoh mơ̆ng 100 êbâo prăk truh 500 êbâo prăk, pioh čhĭ kơ puhng ƀuôn sang. Grăp combo kreh mâo djăp mta msĕ si: Kđeh čĭm, kan, djam hbei boh kroh, êa prăi, mnơ̆ng bi ƀăt, êa msĭn, boh mnŭ, êa ksâo, braih, dŭm mta mnơ̆ng yua mkăn kơ mnuih hlăm gŏ sang... Ară anei mâo 5 êpul êya anôk bruă ti ƀuôn prŏng Ƀuôn Ama Thuôt msĕ si siêu thị Go Ƀuôn Ama Thuôt, siêu thị Co.opmart Ƀuôn Ama Thuôt, siêu thị M Mega Ƀuôn Ama Thuôt, dŭm anôk čhĭ mkăn msĕ si Vinmart, Bách Hoá Xanh srăng mâo hdră čhĭ mnia hŏng online, čhĭ hlue hŏng combo lehanăn mâo ênoh hơĭt hŏng jih jang mnơ̆ng yua aguah tlam.

Aduôn trần Thị Thanh Nhân, k’iăng khua kiă kriê siêu thị Co.opmart Ƀuôn Ama Thuôt brei thâo, anôk čhĭ mnia anei čŏng mkă tĭng dăp leh ênoh mnơ̆ng ƀơ̆ng huă yua, mnơ̆ng yua aguah tlam, tiŏ nao mnuih ngă bruă đru ba jao mnơ̆ng kơ phung blei:

“Anôk bruă mâo mkŏ mjing leh combo djăp mta mnơ̆ng yua msĕ si djam mtam, čĭm kan pioh kơ phung ƀuôn sang blei bi ênưih lehanăn pral hĭn. Bi phung blei hŏng online hlăm facebook, zalo mrô đĭng blŭ êlan mjêč pral mơ̆ng anôk bruă srăng tiŏ nao mnuih tŭ mă ênoh mnuih blei lehanăn mprăp mnơ̆ng ba jao kơ pô blei hŏng klei pral hĭn”.

Lưu Văn Khôi, Khua knơ̆ng bruă duh mkra mnia mblei čar Daklak brei thâo, tui si klei knơ̆ng bruă bi tĭng, ênoh mnơ̆ng mơ̆ng čar čŏng mâo msĕ si čĭm ŭn mâo leh truh 830 êbâo drei ŭn, êmô kbao mâo truh 305 êbâo drei, mnŭ ada, bip sin mâo giăm 13 êklăk drei, djam mta boh kroh mâo leh truh 10 êbâo 500ha anôk pla mjing. Snăn dah tĭng mkă ăt dưi mâo djăp leh mơh djăp mnơ̆ng ƀơ̆ng. Mbĭt hŏng anăn, braih mkuê̆, lehanăn djăp mta mnơ̆ng yua mkăn mâo mkăp pioh leh mơh truh kơ 3 blư̆ lu hĭn hŏng yăng đar. Jih jang mnơ̆ng mkăp pioh anăn srăng dưi djăp hlăm wưng dôk mdrơ̆ng hŏng klei ruă tưp )

"Mnơ̆ng dhơ̆ng mâo jing lu, lehanăn jih jang siêu thị, sang mnia mblei mâo leh sơăi hdră tui duah mnơ̆ng dhơ̆ng bi djăp, hơĭt leh kơ klei anăn. Hrue êlâo kơ hlue ngă asăp mtrŭn mrô 16 tal anei amâo lŏ mâo ôh klei phung ƀuôn sang bi nao blei mnơ̆ng sa anôk hlăm sa mmông čiăng blei, snăn boh sĭt ƀuh jing hơĭt ai tiê mơh”.

Mrâo leh êgao, Knơ̆ng bruă sang čư̆ êa ƀuôn prŏng Ƀuôn Ama Thuôt, čar Daklak mâo leh hră mtrŭn hlue ngă bruă mkăp djăp mnơ̆ng ƀơ̆ng huă êjai hlăm wưng dôk ngă bruă bi ktlah yang ƀuôn hlue hŏng asăp mtrŭn mrô 16/CT-TTg mơ̆ng khua knŭk kna. Hlue anăn, hŏng bruă mkăp mnơ̆ng ƀơ̆ng huă hlue hŏng hdră blei hlăm online srăng mâo ngă hlăm dua hdră. Tal êlâo, phung ƀuôn sang čiăng blei mnơ̆ng bi tuôm ti anôk mkăp mnơ̆ng dhơ̆ng hlăm anôk bruă, mnuih mă bruă mơ̆ng anôk bruă anei srăng pral dăp lehanăn ba mtam mnơ̆ng kơ puhng ƀuôns ang blei. Tal dua, mnuih blei mnơ̆ng akâo blei mnơ̆ng, lehanăn mơĭt prăk tla mnơ̆ng blei hŏng êlan mơ̆ng Êpul bi đru ti alŭ, ƀuôn, ti dŭm să, ƀuôn hgŭm. Hŏng hdră anei, êdeh nao ba mnơ̆ng mơ̆ng anôk čhĭ mnia srăng mkăp djăp mnơ̆ng truh ti dŭm êpul bi đru, să, ƀuôn hgŭm, amâodah ti knơ̆ng bruă sang čư̆ êa să, ƀuôn hgŭm bi tiŏ nao mnuih, êdeh êdâo nao mă mnơ̆ng ti anôk blei, tơdah êpul êya anôk čhĭ mnơ̆ng amâo mâo pral tiŏ nao mnuih jao mnơ̆ng, leh kơ anăn ba jao wĭt mnơ̆ng kơ phung ƀuôns ang tui si ênoh akâo blei.

Êdeh hiu jao mnơ̆ng mơ̆ng anôk čhĭ mnơ̆ng srăng dưi tiŏ nao, amâodah jing êdeh mơ̆ng bruă sang čư̆ êa alŭ wăl anăn mâo klei dưi bi klă brei nao. Mnuih ngă bruă mơ̆ng anôk čhĭ mnơ̆ng mâo kdrăp čŭt h'ô sa hnơ̆ng mơ̆ng anôk bruă, lehanăn mâo leh boh tŭ dưn klei mkă dlăng amâo mâo kman klei ruă tưp ôh./.

Pô mblang: Y-Khem Niê