VOV4.Êđê - Hruê 27-8, čar Dak Lak mphŭn hluê ngă Hdră kčah ksiêm mkă pral kman Sars- Cov-2 kơ jih jang mnuih ƀuôn sang ƀuôn prŏng Ƀuôn Ama Thuôt kñăm pral thâo ƀuh phung F0 hlăm êpul êya. Hlăm hruê tal êlâo, ƀuôn prŏng ksiêm mkă kơ hlăm brô 10 êbâo gŏ êsei mnuih ƀuôn sang ti ƀuôn hgŭm Thống Nhất leh anăn Tự An hŏng 62 anôk mă mta ksiêm mkă. Đoàn Ngọc Thượng, K’iăng Khua knơ̆ng bruă sang čư̆ êa ƀuôn prŏng Ƀuôn Ama Thuôt brei thâo, čiăng kơ bruă test pral Covid-19 rơ̆ng djŏ hdră kčah, ƀuôn prŏng mkŏ mjing leh 70 êpul mă mta ksiêm mkă leh anăn 2 êpul hiu mă mta ksiêm mkă pral kman SARS-CoV-2 kơ mnuih ƀuôn sang ti 21 să, ƀuôn hgŭm. Grăp êpul ksiêm mkă hlăm brô 400 čô/hruê. Wưng mă mta ksiêm mkă mĭn tĭng srăng bi leh hlăm wang mơ̆ng 5-7 hruê hŏng hnơ̆ng ksiêm mkă hlăm brô 375 êbâo čô mnuih. Hruê 27-8, ti dŭm anôk mă mta ksiêm mkă ti 2 alŭ wăl ƀuôn hgŭm Thống Nhất leh anăn Tự An ka ƀuh ôh phung djŏ kman SARS-CoV-2.

Mơ̆ng 6 mmông tlam hruê 26/8, ƀuôn prŏng Ƀuôn Ama Thuôt, čar Dak Lak ngă leh klei bi kbưi yang ƀuôn tui si hdră mtrŭn mrô 16. Tui hluê anăn, hlăm 5 hruê tal êlâo, ƀuôn prŏng mtă kơ mnuih ƀuôn sang amâo dưi kƀiă mơ̆ng pưk sang čiăng ksiêm mkă lehanăn mă jih jang phŭng F0 hlăm êpul êya yang ƀuôn, hlăm hruê mmông anei, bruă sang čư̆ êa ƀuôn prŏng Ƀuôn Ama Thuôt jao kơ dŭm să, ƀuôn hgŭm mkŏ mjing “Siêu thị hŏng ênoh 0 prăk” čiăng đru kơ mnuih ƀuôn sang mâo klei dleh dlan, mbĭt hŏng anăn ngă klei bi hmô “nao sang mnia kơ mnuih ƀuôn sang ”. Jing gưl tal êlâo hĭn dŭm siêu thị, anôk mnia mblei ti ƀuôn prŏng Ƀuôn Ama Thuôt ngă klei mnia dŭm mta “combon dŭm mta mnơ̆ng yua mjêč” đung leh hŏng hruh mâo ênoh mơ̆ng 100 êbâo truh kơ 500 êbâo čiăng đru klei čiăng yua mơ̆ng mnuih ƀuon sang. Ară anei mâo 5 anôk bruă mkăp brei hlăm alŭ wăl ƀuôn prŏng Ƀuôn Ama Thuôt jing siêu thị Go Buôn Ma Thuột, siêu thị Co.opmart Buôn Ma Thuột, siêu thị MM Mega Buôn Ma Thuột, anôk mnia mblei Vinmart, Bách hóa xanh, ngă klei čhĭ mnia hŏng êlan online, lehanăn čhĭ mnơ̆ng leh đŭng hruh hŏng lu mta mnơ̆ng yua mjêč.