VOV4.Êđê - Knơ̆ng bruă sang čư̆ êa Ƀuôn prŏng Hồ Chí Minh mrâo mâo hră mơar mjêč mơĭt kơ Phŭn bruă mdrao mgŭn hưn kơ bruă blei vaccin gang mkhư̆ Covid-19 mơ̆ng ƀuôn prŏng, klă klơ̆ng blei 5 êklăk vaccine Moderna. Hluê anăn, Knơ̆ng bruă sang čư̆ êa Ƀuôn prŏng Hồ Chí Minh akâo kơ Phŭn bruă mdrao mgŭn brei bi hgŭm knŭk kna - êngao knŭk kna mkŏ mjing hrui mă prăk tlŏ vaccin.  Kơ hnơ̆ng bi trông leh anăn blei vaccin Moderna, leh K’iăng Khua knŭk kna Vũ Đức Đam tŭ ư hlăm hruê 15-6-2021 kơ bruă blei vaccin mơ̆ng ala tač êngao, Knơ̆ng bruă sang čư̆ êa Ƀuôn prŏng Hồ Chí Minh jao leh knơ̆ng bruă Sapharco ngă klei bi trông, kuôl kă blei vaccin gang mkhư̆ klei ruă Covid-19 ti alŭ wăl. Mơ̆ng tur knơ̆ng anăn, Knơ̆ng bruă Sapharco bi siñê leh klei bhiăn kơ bruă mkăp vaccin gang mkhư̆ klei ruă Covid-19 Moderna. Truh kơ ară anei, Knơ̆ng bruă Sapharco dôk guôn Pô bi ala Moderna ba hră čih bi kuôl kă blei 5 êklăk aruăt vaccine Moderna.  Čiăng rơ̆ng kơ bruă dưi mâo vaccin leh anăn mđĭ klei dưi iêu jak klei iêu mkrum mơ̆ng ala ƀuôn, Knơ̆ng bruă sang čư̆ êa Ƀuôn prŏng Hồ Chí Minh akâo kơ Phŭn bruă mdrao mgŭn brei mâo hdră êlan klă sĭt dưi brei Knơ̆ng bruă VinaCapital hluê ngă klei bi hgŭm knŭk kna- êngao knŭk kna, mkŏ mjing hrui blei vaccin hluê si klei bhiăn “blei 5 aruăt vaccin srăng mđup brei kơ ala ƀuôn sa aruăt”.

H Zawut pô mblang