VOV4.Êđê- Hưn mdah hŏng K’iăng Khua Knŭk kna Trương Hòa Bình hlăm klei bi kƀĭn aguah 1/6, Khua Knơ̆ng bruă Sang čư̆ êa ƀuôn prŏng Hồ Chí Minh Nguyễn Thành Phong brei thâo, ti anăp klei ruă tưp lar hlăm dŭm wăl tuh tia mkra mjing, anăp truh ƀuôn prŏng srăng pŏk ngă ti đa đa anôk bruă mnia blei čuăl krĭng mkra mjing êjai čiăng gang mkhư̆ klei ruă tưp tơdah mâo. Ƀuôn prŏng ăt pŏk ngă ênoh đru tal 2 kơ dŭm anôk bruă mnia blei hmaĭ mơ̆ng klei ruă Covid-19. Ară anei, ƀuôn prŏng Hồ Chí Minh mâo leh 3 čô mnuih ruă mă bruă hlăm wăl tuh tia mkra mjing jing: Wăl tuh tia mkra mjing Tân Bình Wăl tuh tia mkra mjing Yŭ Dưr Củ Chi, Wăl tuh tia mkra jing Vĩnh Lộc- Hóc Môn. Hluê si Nguyễn Thành Phong, Khua knơ̆ng bruă sang čư̆ êa ƀuôn prŏng Hồ Chí Minh, ti anăp klei huĭ tư lar klei truă, sa hlăm dŭm mta phŭn brei ngă ară anei jing mă mta ksiêm mkă kơ mnuih mă bruă hlăm wăl tuh tia mkra mjing, wăl mkra mjing yua kdrăp mrâo mrang. Ară anei ƀuôn prŏng mâo 1.600.000 čô mnuih mă bruă. Hjăn wăl tuh tia mkra mjing mâo 280 êbâo čô mnuih mă bruă leh anăn 3000 čô phung thơ̆ng kơ bruă, wăl mă bruă ba yua kdrăp mrâo mâo 45 êbâo čô.

Pô mblang: H’Zawut Ƀuôn Yă