VOV4.Êđê - Hlăm klei kƀĭn online ti tlam 17/6 hŏng ƀuôn prŏng Hồ Chí Minh lehanăn čar Bắc Giang, k’iăng khua knŭk kna Vũ Đức Đam, khua êpul gĭt gai ala čar bruă gang mkhư̆ klei ruă tưp Covid-19, mtă kơ ƀuôn prŏng Hồ Chí Minh lŏ mđĭ hĭn klei thâo hlăm bruă ksiêm mkă kman, hmao ƀuh hnưm leh anăn čuăl krĭng dŭm anôk mâo klei ruă tưp. Gĭr ktưn amân ngă klei bi kbưi sui hruê huĭ dah mâo klei amâo jăk hlăm dŭm anôk bi ktlah, čuăl krĭng. Mâo klei hơĭt kyua bruă ksiêm mkă kman ti ƀuôn prŏng Hồ Chí Minh dưi mđĭ truh 30.000 klei ksiêm mkă hlăm sa hruê ară anei, k’iăng khua knŭk kna Vũ Đức Đam mtă kơ ƀuôn prŏng Hồ Chí Minh lŏ ngă kjăp dŭm hdră êlan gang mkhư̆ klei ruă tưp, gang klei ruă tưp nao mŭt hlăm dŭm anôk bruă tuh tia. Bi kơ čar Bắc Giang, dưi lŏ brei 123 knơ̆ng bruă lŏ wĭt ngă bruă msĕ yăng đar kơ giăm 20.000 mnuih mă bruă. Tui si k’iăng khua knŭk kna Vũ Đức Đam, čar Bắc Giang čiăng mbha êpul anôk bi ktlah dôk mâo mnuih ruă lehanăn anôk êgao leh lu hruê amâo mâo F0, mơ̆ng anăn kñăm hlăm dŭm hdră êlan mgaih msir dŭm anôk bi ktlah ka mâo ôh klei êđăp ênang.