VOV4.Êđê- Hlăm klei bi kƀĭn online mơ̆ng Dhar bruă gĭt gai ala čar kơ hdră gang mkhư̆ klei ruă Covid-19 hŏng khua gĭt gai ƀuôn prŏng Hồ Chí Minh, K’iăng Khua Knŭk kna Vũ Đức Đam, Khua anôk bruă gĭt gai mñă klă: Ƀuôn prŏng Hồ Chí Minh brei ba yua jih hruê mmông hluê ngă klei bi ktlah yang ƀuôn hluê si Asăp mtrŭn 16 mơ̆ng Khua knŭk kna hŏng ai tiê ti anôk dôk brei dôk tinăn yơh čiăng mkhư̆ dŭm anôk mâo klei ruă tưp. Hâo hưn hlăm klei bi kƀĭn, Nguyễn Thành Phong, Khua Knơ̆ng bruă sang čư̆ êa ƀuôn prŏng Hồ Chí Minh brei thâo: Ară anei alŭ wăl anei dôk mjêč mprăp dŭm hdră kơ bruă ngă klei bi ktlah yang ƀuôn kluôm ƀuôn prŏng hlăm wang 15 hruê, mphŭn mơ̆ng krah mlam hruê 9-7 rơ̆ng klei hdĭp mda mnuih ƀuôn sang, amâo mtŭk mtul leh anăn hmaĭ amâo mâo jăk ôh. Blŭ hrăm hlăm klei bi kƀĭn, K’iăng Khua knŭk kna Vũ Đức Đam mtă: brei bi ktlah djŏ tui si ai tiê mđĭ hĭn sa hnơ̆ng, ba yua jih hruê bi ktlah tui si Asăp mtrŭn mơ̆ng Khua knŭk kna čiăng mkhư̆ klei ruă tưp.

 Pô mblang: H’Zawut Ƀuôn Yă