VOV4.Êđê - Tui si knơ̆ng bruă mdrao mgŭn ƀuôn prŏng Hồ Chí Minh, hruê mmông êgao, mâo lu čar, ƀuôn prŏng kâo klei đru kơ mnuih ƀuôn sang dôk hdĭp ti ƀuôn prŏng Hồ Chí Minh dưi wĭt kơ ƀuôn sang pô. Kñăm ngă klei găl kơ mnuih ƀuôn sang dưi wĭt kơ ƀuôn sang pô hŏng klei êđăp ênang, knơ̆ng bruă mdrao mgŭn jao kơ anôk bruă ksiêm dlăng klei ruă tưp ƀuôn prŏng Hồ Chí Minh mkăp brei mnơ̆ng yua bruă mdrao mgŭn kơ anôk bruă mdrao mgŭn dŭm kdriêk čar, kdriêk leh anăn ƀuôn prŏng Thủ Đức čiăng ksiêm mkă kman kơ̆ng mnuih ƀuôn sang čiăng wĭt kơ ƀuôn phŭn pô.

Knơ̆ng bruă mdrao mgŭn lač kơ bruă sang čư̆ êa dŭm čar, ƀuôn prŏng mơĭt hdră anăn mnuih ƀuôn sang kơ bruă sang čư̆ êa dŭm kdriêk čar, kdriêk leh anăn ƀuôn prŏng Thủ Đức čiăng ngă tur knơ̆ng mkŏ mjing klei ngă bruă. Knơ̆ng bruă mdrao mgŭn ƀuôn prŏng Hồ Chí Minh mtă kơ bruă sang čư̆ êa dŭm kdriêk čar, kdriêk, ƀuôn prŏng Thủ Đức bi mguôp hŏng anôk bruă mdrao mgŭn mkŏ mjing bruă ksiêm mkă kman hmar kơ mnuih ƀuôn sang leh anăn đru klei mdrao mgŭn djŏ hŏng klei bhiăn. Bi kơ phung mâo klei ruă tưp Covid-19 srăng mgaih msir hŏng klei bhiăn.

Y Khem pô mblang